نئی دہلی: وزیر دفاع راج ناتھ سنگھ نے آج دیسی ساختہ ہلکے جنگی طیارے تیجس میں سمیلیٹر کے ذریعے پرواز کا تجربہ کیا اور کہا کہ یہ حیرت انگیز تھا۔ راج ناتھ سنگھ ان دنوں دو روزہ بنگلور کے دورے پر ہیں۔ آج انہوں نے ایروناٹیکل ڈویلپمنٹ اسٹابلشمنٹ (اے ڈی اے ) کا دورہ کیا۔ اس اسٹابلشمنٹ میں وہ تیجس ہوائی جہاز کے سمیلیٹر میں بیٹھے اور طیارے کے اڑنے کا تجربہ کیا۔بعد میں انہوں نے ٹویٹ کیا کہ “بنگلورو کے ایروناٹیکل ڈویلپمنٹ اسٹابلشمنٹ (اے ڈی اے ) میں ایل ایس اے تیجس سمیلیٹر کو اڑانے کا شاندار تجربہ۔ ٹویٹ کے ساتھ انہوں نے اپنے تجربے کی ایک تصویر بھی شیئر کی ہے جس میں وہ سمیلیٹر کے کاک پٹ میں بیٹھے ہوئے نظر آرہے ہیں۔ اس کے ساتھ ایک پائلٹ بھی ہے جس کے ہاتھ میں سمیلیٹر کا کنٹرول کمانڈ ہے ۔ سمیلیٹر کا ڈسپلے ہوائی جہاز کی اونچائی اور دیگر ڈیٹا کو ظاہر کرتا ہے ۔ یہ اسٹابلشمنٹ مسلح افواج کے لیے بغیر پائلٹ طیارے اور دیگر فضائی نظام تیار کرنے کے لیے کام کرتی ہے ۔
