نئی دہلی: سپریم کورٹ نے فلمی اداکارہ شلپا شیٹی کے شوہر اور معروف ہیرا تاجر راج کندرا کی پورن فلم ریاکٹ معاملے میں گرفتاری پر چہارشنبہ کو چار ہفتوں کیلئے عبوری روک لگادی۔ جج ونیت سرن اور جج انیرودھ بوس کی بینچ نے کندرا کی عرضی پر اسے راحت دے دی۔ بنچ نے اس معاملے میں مہاراشٹرا حکومت اور ممبئی پولیس کی کرائم برانچ کو نوٹس جاری کرکے جواب طلب کیا ہے ۔ممبئی پولیس نے پورن فلم کے غیر قانونی کاروبار میں ملوث ہونے کے الزام میں کندرا پر مختلف مجرمانہ دفعات کے تحت ایف آئی آر درج کی تھی۔ یہ فوجداری معاملہ 2020 کا ہے ۔ پہلے سے ہی کئی فوجداری الزامات میں گھرے کندرا نے اس معاملے میں بامبے ہائی کورٹ سے پیشگی ضمانت کی فریاد کی، جسے خارج کردیا گیا تھا۔ اس کے بعد اس نے سپریم کورٹ کا دروازہ کھٹکھٹایا جہاں سے اسے راحت مل گئی۔ شلپا شیٹی کے شوہر کندرا کو ایک دوسرے فوجداری معاملے میں ممبئی پولیس نے جولائی میں گرفتار کیا تھا۔
