نئی دہلی: راشٹریہ ناگرک پارٹی 2024 کے عام انتخابات میں دہلی کے سبھی سات سیٹوں پر الیکشن لڑے گی، لیکن مساوات پر مبنی سماج کی بنیاد کو مضبوط بنانے کے لیے وہ ایک سیٹ پر خواجہ سرا امیدوار کو کھڑا کرے گی۔راشٹریہ ناگرک پارٹی کے صدر کے کے گوتم نے ہفتہ کو یہاں ایک پریس کانفرنس میں کہا کہ ان کی پارٹی مساوات پر مبنی معاشرے کے تصور کے ساتھ آگے بڑھ رہی ہے ، اس لیے پارٹی 2024 کے عام انتخابات میں دہلی کی تمام سیٹوں پر امیدوار کھڑے کرے گی اور ایک سیٹ پرٹرانس جینڈر امیدوار کو انتخابی میدان میں اتارے گی۔ اس موقع پر پارٹی کے نائب صدر دیویندر ودلاگ، ترجمان راجیندر کمار، قومی جنرل سکریٹری رام نواس اور کئی عہدیدار موجود تھے ۔ انہوں نے کہا کہ پارٹی 2025 کے دہلی اسمبلی انتخابات میں تمام سیٹوں پر امیدوار کھڑا کرے گی۔انہوں نے کہا کہ مساوات پر مبنی معاشرے کی تعمیر ان کی پارٹی کا تصور ہے اور پارٹی اسی اصول کو پورا کرنے کے لیے الیکشن لڑ رہی ہے ۔ انہوں نے کہا کہ ان کی پارٹی چاہتی ہے کہ پارلیمنٹ سے لے کر جمہوریت کی چھوٹی سے چھوٹی اکائی تک شہریوں کو قابل اعتماد عوامی نمائندگی ملے ، معاشرے کے ہر فرد کو اہمیت حاصل ہو اور ہر شہری کو موقع ملے ۔مسٹر گوتم نے کہا، “مساوات پر مبنی شہریوں کی نمائندگی کا نظام ان کی پارٹی کا نظریہ ہے اور مانتی ہے کہ ٹرانس جینڈر، مرد اور خواتین، سبھی کو عوام کا نمائندہ ہونا چاہیے ۔ پارٹی کا کہنا ہے کہ چھوٹی پارٹیوں کو انتخابات میں اہمیت حاصل ہو اس کے لئے انہیں مقررہ نمائندگی دی جانی چاہیے ۔
