راہول گاندھی کا استفسار ، مودی پر اپنے دوستوں کو بچانے کا الزام
نئی دہلی: کانگریس کے سابق صدر راہول گاندھی نے رافیل جیٹ سودے میں ہونے والے اسکام کے حوالہ سے وزیر اعظم نریندر مودی پر ایک مرتبہ پھرتنقید کی ہے۔ راہول گاندھی نے ٹوئٹر پر سوال پوچھ کر لوگوں سے جواب مانگا ہے کہ آخر وزیر اعظم مودی رافیل سودے کی جے پی سی تفتیش سے کیوں بچ رہے ہیں!سوال پوچھنے کے بعد راہول گاندھی نے چار متبادل بھی پیش کئے ہیں جن میں سے ایک متبادل ہے کہ وزیر اعظم نریندر مودی جرم ثابت ہونے کے خوف سے اس پورے معاملہ کی جوائنٹ پارلیمانی کمیٹی (جے پی سی) سے تحقیقات کرانے سے گریز کر رہے ہیں۔ دوسرا متبادل ہے کہ وزیر اعظم مودی کے دوست اس سارے گھوٹالے میں پھنس رہے ہیں اور وہ اپنے تمام دوستوں کو بچانا چاہتے ہیں۔ لہذا اس معاملے کی جے پی سی سے تحقیق نہیں کرانا چاہتے ہیں۔راہول گاندھی نے ٹوئٹ کیا کہ مودی حکومت جے پی سی تحقیقات کے لئے کیوں تیار نہیں ہے؟ احساس جرم کی وجہ سے۔ انہیں اپنے قصوروار دوستوں کو بھی بچانا ہے۔ جے پی سی کو راجیہ سبھا کی سیٹ نہیں چاہئے۔ یہ تمام آپشنز درست ہیں۔‘‘خیال رہے کانگریس شروع سے ہی رافیل سودا میں گھوٹالے کا الزام عائد کرتی رہی ہے۔ پارٹی نے ہفتے کے روز بھی جے پی سی کی تحقیقات کا مطالبہ کرتے ہوئے یہ بھی کہا تھا کہ فرانس میں اس گھوٹالے کی تحقیقات کی جارہی ہے، لہذا ہندوستانی حکومت کو بھی پارلیمانی کمیٹی کے ذریعہ اس کی تحقیقات کرانی چاہئے۔ اپنے ایک ٹوئٹر میں راہول گاندھی نے ’چور کی داڑھی‘ کہہ کر بھی رافیل سودے میں اسکام کے خلاف آواز اٹھائی تھی۔
