شخصی طور پر حاضر نہ ہونے پر کارروائی، 15 فبروری کواگلی سماعت
ترواننتاپورم: کیرالا کی ایک عدالت نے متنازعہ یوگا گرو بابا رام دیو کے خلاف ناقابل ضمانت وارنٹ گرفتاری جاری کیا ہے۔ رام دیو کے ساتھی اور پتانجلی آیوروید کمپنی کے ایم ڈی آچاریہ بالکرشنا کے خلاف بھی وارنٹ جاری کیا گیا ہے۔دونوں پر آیورویدک مصنوعات کی فروخت کیلئے پتانجلی کی جانب سے گمراہ کن اشتہارات دینے کا الزام ہے۔ کیرالا کے ڈرگ انسپکٹر نے اس سلسلے میں دونوں کے خلاف مقدمہ درج کر لیا ہے۔ اس معاملے کی تحقیقات کے ایک حصے کے طور پر، پالکڑ عدالت نے پہلے رام دیو اور آچاریہ بالاکرشن کو نوٹس بھیجا تھا اور دونوں کو یکم فروری کو سماعت کے لیے شخصی طور پر پیش ہونے کا حکم دیا گیا تھا۔تاہم ان میں سے کوئی بھی ہفتہ کے روز سماعت میں شریک نہیں ہوا، جس کے بعد ان کے خلاف ناقابل ضمانت وارنٹ گرفتاری جاری کیے گئے۔ کیس کی سماعت 15 فروری کو ہو گی۔ دریں اثنا، حکومت نے پہلے پتانجلی کی ذیلی کمپنی دیویا فارمیسی کے دس پروڈکٹس پر پابندی لگا دی تھی۔ اس نے ان مصنوعات کے مینوفیکچرنگ لائسنس کو یہ کہتے ہوئے منسوخ کر دیا کہ ان کے حوالے سے میڈیا میں جاری کیے گئے اشتہارات گمراہ کن تھے۔
