لاک ڈاؤن کی خلاف ورزی پر سخت کارروائی ، کمشنر پولیس مہیش بھگوت
حیدرآباد :۔ لاک ڈاؤن کے دوران غیر ضروری گھومنے والوں کے خلاف راچہ کنڈہ پولیس کی جانب سے سخت اقدامات و کارروائیاں کی جارہی ہیں ۔ پولیس نے گاڑیوں کو ضبط کرنے کے احکامات کے بعد کل پہلے دن 1579 گاڑیوں کو ضبط کرلیا ۔ اس سلسلہ میں کمشنر پولیس مہیش بھگوت نے بتایا کہ لاک ڈاؤن کی خلاف ورزی کرنے والوں کے خلاف فوجداری ( کریمنل ) کیس بھی درج کئے جائیں گے ۔ انہوں نے بتایا کہ 12 مئی سے کمشنریٹ حدود میں سخت اقدامات جاری ہیں ۔ 12 تا 21 مئی کے درمیان کل 25,537 مقدمات درج کئے گئے جن میں 17360 مقدمات لاک ڈاؤن کی خلاف ورزی کے ہیں ۔ کمشنر پولیس راچہ کنڈہ نے بتایا کہ 6367 ایسے مقدمات ہیں جس میں عوام نے ماسک کا استعمال ٹھیک طرح سے نہیں کیا تھا ۔ جب کہ غیر ضروری ہجوم جمع ہونے پر اور اس کا سبب بننے والے 339 مقدمات درج کئے گئے ۔ انہوں نے بتایا کہ 295 ایسے شہری پائے جاتے ہیں جنہوں نے لاک ڈاؤن کی پرواہ کئے بغیر کھلے مقامات پر شراب نوشی کررہے تھے ۔ انہوں نے بتایا کہ راچہ کنڈہ حدود میں قائم کئے گئے 46 چیک پوسٹوں پر تمام اعلیٰ عہدیداروں کو چوکس رکھا گیا تھا ۔ پولیس بڑی ہی چوکسی اور مستعدی سے اقدامات کرلیا ہے ۔ انہوں نے بتایا کہ عوام میں شعور بیدار کرنے کے لیے خصوصی پروگرام منعقد کئے گئے ۔ انہوں نے عوام کو غیر ضروری مکانات سے باہر نہ آنے کا مشورہ دیا اور کہا کہ پولیس سخت کارروائی انجام دے گی ۔۔
