نئی دہلی: کانگریس کے سابق صدر راہل گاندھی نے وزیراعظم نریندر مودی کو خط تحریر کرکے کہاکہ لکشدیپ ایڈمنسٹریٹر عوام م خالف فیصلے کررہے ہیں جن کی زبردست مخالفت ہورہی ہے اس لئے انہیں (مسٹر مودی) کو اس معاملہ میں مداخلت کرنی چاہئے ۔ گاندھی نے جمعرات کو تحریر کردہ خط میں کہا کہ لکشدیپ کے ایڈمنسٹریٹر پرفل کھوڑا پٹیل مسلسل ایسے قدم اٹھارہے ہیں جن سے لکشدیپ کی خوبصورتی اور ثقافت کے انوکھے سنگم کو نقصان پہنچ رہا ہے ۔ لوگ اس وراثت کو بچانے کے لئے تحریک چلا رہے ہیں اور ان کا کہنا ہے کہ ایڈمنسٹریٹر منتخب نمائندوں اور عوام سے مشورہ کئے بغیر یکطرفہ فیصلے کرکے بڑی تبدیلیاں کررہے ہیں۔انہوں نے کہاکہ لکشدیپ کے لوگ ان تجاویز کو من مانی قرار دیکر مخالفت کررہے ہیں۔ ڈرافٹ کی تجاویز سے زمین کی ملکیت سے متعلق حقوق کو کمزور کرتے ہیں، کچھ سرگرمیوں کے لئے ماحولیاتی ضوابط کو کمزور کرنے کے ساتھ ساتھ متاثرہ افراد کے لئے قانونی امداد کے متبادل کو محدود کرتے ہوئے عوامی حقوق پر حملہ ہورہا ہے ۔ گاندھی نے کہاکہ پنچایت ریگولیشن کے مسودے میں دو سے زیادہ بچوں والے اراکین کو نااہل اعلان کرنے کا التزام ہے جو واضح طورپر غیرجمہوری قدم ہے ۔
نہرو کی 57ویں برسی ،راہول گاندھی کا خراج عقیدت
نئی دہلی: سابق کانگریس صدر راہل گاندھی نے جمعرات کے روز ملک کے اولین وزیر اعظم جواہر لال نہرو کی 57 ویں برسی پر انہیں خراج عقیدت پیش کیا۔ راہول گاندھی نے اپنے پردادا کو خراج عقیدت پیش کرتے ہوئے کہا کہ برائی بے قابو شکل میں پھیلتی ہے اور اگر اسے خاموشی سے برداشت کیا جاتا رہے تو یہ سارے نظام کو تباہ کردیتی ہے ۔انہوں نے مزید کہا کہ ” مجھے پنڈت جواہر لال نہرو کی برسی کے موقع پر ان کے الفاظ یاد آرہے ہیں‘‘۔