نئی دہلی۔14 اپریل (سیاست ڈاٹ کام) ہندوستانی کرکٹ ٹیم کے سابق اوپنر اوررکن پارلیمنٹ گوتم گمبھیر نے کہا ہے کہ لوکیش راہول محدود اوورز میں ہندوستانی وکٹ کیپر مہندر سنگھ دھونی کے متبادل ہو سکتے ہیں۔دھونی گزشتہ سال انگلینڈ میں ہوئے آئی سی سی ورلڈ کپ کے سیمی فائنل میں نیوزی لینڈ کے خلاف ہندوستان کی شکست کے بعد سے اب تک میدان سے باہر ہیں اور ان کی اس سال آئی پی ایل سے واپسی کی امید تھی۔آئی پی ایل ان کے لئے آسٹریلیا میں اس سال اکتوبر میں ہونے والے آئی سی سی ٹی20 ورلڈ کپ میں انتخاب کے لئے کافی اہم ثابت ہوگا لیکن کورونا وائرس کے خطرے کو دیکھتے ہوئے بی سی سی آئی نے اسے 15 اپریل تک ملتوی کر دیا تھا اور حالات کو دیکھتے ہوئے اس کے آگے ہونے کا امکان بہت کم ہے۔گمبھیر نے اسٹار اسپورٹس کے پروگرام کرکٹ کنکٹڈ میں کہا کہ راہول دھونی کا متبادل ہو سکتے ہیں۔انہوں نے ٹی20 اور ون ڈے میں کئی بار وکٹ کپنگ کی ہے۔میں نے ان کی کارکردگی دیکھی ہے۔بیٹنگ اور وکٹ کپنگ دونوں کرتے دیکھا ہے۔اگرچہ وہ دھونی سے اچھے نہیں ہیں لیکن ٹی 20 کرکٹ میں راہول بہتر ہوں گے اور آپ ان کو تیسرے یا چوتھے نمبر پر بیٹنگ کرواسکتے ہیں۔انہوں نے کہا کہ اگر اس سال آئی پی ایل نہیں ہوا تو دھونی کے لئے واپسی کرنا مشکل ہوگا۔انہیں کس بنیاد پر ٹیم میں شامل کیا جائے گا جبکہ وہ تقریبا ایک سال سے ٹیم سے باہر ہیں۔گمبھیر سے پہلے ہندوستان کے سابق کپتان کرشنمچاری سری کانت نے بھی کہا تھا کہ اگر اس سال آئی پی ایل نہیں ہوا تو دھونی کا کیریئر ختم ہو جائے گا۔ سری کانت نے کہا تھا کہ میں توڑموڑ کر بات نہیں کروں گا لیکن اگر اس سال آئی پی ایل نہیں ہوتا ہے تو دھونی کی واپسی کی امید بالکل ختم ہو جائے گی۔اگرچہ ان دونوں کھلاڑیوں سے الگ انگلینڈ کے سابق کپتان ناصر حسین نے دھونی کی تعریف کی تھی اور کہاہے کہ ان میں اب بھی کافی کرکٹ باقی ہے اور دھونی ہندوستانی ٹیم کے لئے بہت کچھ کر سکتے ہیں۔غور طلب ہے کہ دھونی کی قیادت میں ہندوستان نے 2007 ٹی 20 ورلڈ کپ اور 2011 میں ونڈے ورلڈ کپ جیتا تھا اور وہ تین بار کے آئی پی ایل چمپئن بھی ہیں۔لیکن دھونی کے میدان سے باہر رہنے نے ان کے کیریئر پر قیاس آرائیوں کا بازار گرم کر دیا ہے اگرچہ دھونی نے ابھی تک اس بارے میں کوئی تبصرہ نہیں کیا ہے۔
