انڈیا الائنس ملک دشمن طاقتوں کے دباؤ میں جمہوریت کو بدنام کر رہے ہیں:شیوراج
نئی دہلی، 11 اگست (یو این آئی) زراعت اور کسانوں کی فلاح و بہبود کے مرکزی وزیر شیوراج سنگھ چوہان نے الزام لگایا ہے کہ کانگریس کے سابق صدر اور لوک سبھا میں اپوزیشن لیڈر راہول گاندھی نے پہلے بیرون ملک جا کر ملک کو بدنام کیا اور اب الیکشن کمیشن کو بدنام کر رہے ہیں۔ پیر کو یہاں جاری ایک ویڈیو پیغام میں چوہان نے کہا کہ راہول گاندھی اور انڈیا الائنس ملک دشمن طاقتوں کے دباؤ میں جمہوریت کو بدنام کر رہے ہیں۔ انہوں نے کہا کہ راہول گاندھی نے پہلے بیرون ملک جا کر ملک کو بدنام کیا، الیکشن کمیشن کو بدنام کیا، کمپٹرولر اور آڈیٹر جنرل کو بدنام کیا، فوج کی عزت سے کھیلا اور فوج کی بہادری پر سوال اٹھائے ۔چوہان نے کہا کہ وہ جمہوریت کو پامال کررہے ہیں، وہ آئینی اداروں کے وقار کو مجروح کررہے ہیں، وہ انتشار پھیلانا چاہتے ہیں۔ انہوں نے کہا کہ راہول گاندھی بار بار جھوٹ بول رہے ہیں، انہوں نے آپریشن سندور پر جھوٹ بولا اور جب فوج نے تمام حقائق سامنے رکھے تو ان کی زبان بند ہوگئی۔پہلے انہوں نے الیکٹرانک ووٹنگ مشین (ای وی ایم) پر سوال اٹھائے کہ وہ ای وی ایم کی وجہ سے الیکشن ہارتے ہیں، ثبوت مانگا، لیکن کوئی ثبوت نہیں دیا، جب سپریم کورٹ نے ان کی سرزنش کی تو انہوں نے راہ فرار اختیار کی۔ ای وی ایم کا معاملہ چھوڑکر اب وہ ووٹر لسٹ خصوصی جامع نظرثانی (ایس آئی آر) کے عمل پر سوال اٹھا رہے ہیں۔ مرکزی وزیر نے کہا کہ میں راہول گاندھی، کانگریس لیڈروں اور انڈیا الائنس سے پوچھنا چاہتا ہوں، کیا کانگریس ای وی ایم کی وجہ سے انتخابات ہار رہی ہے ؟ کیا کرناٹک میں کانگریس ووٹر لسٹ میں گڑبڑی کی وجہ سے جیتی ہے ؟ کیا اس نے تلنگانہ میں الیکشن کمیشن کی گڑبڑی کی وجہ سے کامیابی حاصل کی ہے ؟ کیا ہماچل پردیش میں الیکشن کمیشن کی گڑبڑی اور ووٹر لسٹ کی گڑبڑی کی وجہ سے کانگریس جیتی ہے ؟ کیا جھارکھنڈ میں آل انڈیا الائنس ہیمنت سورین کی حکومت ووٹر لسٹ میں گڑبڑی کی وجہ سے بنی تھی؟ انہوں نے کہا کہ راہول جی، کیا آپ بھی ووٹر لسٹ میں گڑبڑی کی وجہ سے الیکشن جیتے ہیں؟ کیا پرینکا گاندھی بھی ووٹر لسٹ میں گڑبڑی کی وجہ سے الیکشن جیتی ہیں؟ کیا اکھلیش یادو بھی ووٹر لسٹ میں گڑبڑی کی وجہ سے جیتے ہیں؟ آپ الزامات لگاتے ہیں اور پھر راہ فرار اختیار کرلیتے ہیں۔ چوہان نے کہا الیکشن کمیشن آپ (راہول گاندھی) سے حلف نامہ مانگ رہا ہے ، حلف نامہ دینے میں آپ کو کیا دقت ہے ، آپ ملک کی عزت سے کھیل رہے ہیں، آپ ملک کو بدنام کرنے ، جمہوریت کو بدنام کرنے اور اسے کمزور کرنے کا گناہ کر رہے ہیں، اگر آپ جیت گئے تو سب کچھ ٹھیک ہے ، آپ ہارے تو سب خراب ہے ، میں ملک کے عوام کو خبردار کرنا چاہتا ہوں، ان کی سازشوں سے چوکنا رہیں۔
یہ ملک کو کمزور اور بدنام کرنے کا گناہ کررہے ہیں۔’’
