اواخر سال تک ہر شہری کو ویکسین لگ جائے گا ۔ بی جے پی کا بیان
نئی دہلی: کانگریس کے سابق صدر راہول گاندھی کی جانب سے کورونا کے سلسلے میں وزیراعظم نریندر مودی پر عائد کیے گئے الزامات پر بی جے پی نے جوابی وار کرتے ہوئے کہا کہ راہول نے ملک اور عوام کی بے عزتی کی ہے ۔ بی جے پی کے سینئر لیڈر اور مرکزی وزیر پرکاش جاؤڈیکر نے جمعہ کے روز یہاں پریس کانفرنس میں کہا،‘وزیراعظم ملک کے عوام کے ساتھ مل کر کووڈ کا سامنا کر رہے ہیں، تو اسی وقت سے راہول اس کوشش کے لیے ’نوٹنکی‘ لفظ کا استعمال کرتے ہیں۔ یہ ملک اور عوام کی بے حرمتی ہے ۔ ہم ’نوٹنکی‘ جیسے لفظ کا استعمال نہیں کریں گے کیونکہ ان کی نوٹنکی عوام نے کب کی بند کر دی ہے ’۔ انہوں نے کہا،‘پہلے تو کانگریس کو ویکسین پر بھروسہ نہیں تھا، کانگریس نے ویکسین کے حوالے سے اندیشے ظاہر کیے تھے ۔ یہاں تک کہ کانگریس کے ایک رہنما نے اسے ‘مودی ویکسین’کہا تھا۔ کو ویکسین کے سلسلے میں راہول نے بھرم پھیلایا۔ راہول کہتے ہیں کہ 2024تک ہر کسی کو ویکسین لگے گی، ہم کہتے ہیں’ رواں برس کے آخر تک ہر کسی کو ٹیکہ لگ جائے گا’۔ جاؤڈیکر نے کہا کہ راہول کو ویکسین کی فکر ہے تو پہلے اپنی پارٹی کے اقتدار والی ریاستوں پر توجہ دیں۔ راجستھان میں آئے دن ریپ ہو رہے ہیں۔ حال ہی میں ایک ایمبولینس کا استعمال ریپ کے لیے کیا گیا۔ ایک خاتون رکن پارلیمنٹ پر کانگریس کے کارکنان نے حملہ کیا۔ راہول کو ملک کو ’اُپدیش‘ (وعظ) دینے کے بجائے اپنے اقتدار والی ریاستوں پر توجہ دینی چاہیے ۔ قابل ذکر ہے کہ راہول کی دوسری لہر کے لیے وزیراعظم مودی کو ذمہ دار قرار دیتے ہوئے الزام عائد کیا کہ وبا کو سمجھے بغیر ہی مودی نے اس پر جیت کا اعلان کر دیا تھا جس کے سبب ملک کے لاکھوں افراد کو جان سے جانا پڑا۔ انہوں نے کہا کہ حکومت کی غلطی کا خمیازہ پورے ملک کو بھگتنا پڑ رہا ہے کیونکہ تیسری لہر کا امکان ہے۔
