بیگوسرائے میں ہجوم امنڈپڑا‘بہار میں کانگریس کی انتخابی مہم کا عملاً آغاز
پٹنہ :کانگریس قائد راہول گاندھی نے آج بہار کا دورہ کیا ہے۔ پٹنہ ہوائی اڈے پر ان کا شاندار استقبال کیا گیا جہاں این ایس یو آئی کے قومی انچارج کنہیا کمار بھی موجود تھے۔ راہول گاندھی وہاں سے بیگوسرائے کے لیے روانہ ہوئے۔اس دوران بیگوسرائے پہنچنے پر راہول گاندھی کا سبھاش چوک پر بھی ان کا والہانہ استقبال کیا گیا۔ راہول کی اپیل پر کانگریس قائدین اور کارکنوں نے سفید ٹی شرٹ پہنی ۔بہار اسمبلی انتخاب کو لے کر کانگریس پوری طرح سے سرگرم ہو چکی ہے۔ اس کے تحت پارٹی نے کنہیا کمار کی قیادت میں ’پلاین روکو، نوکری دو‘ پد یاترا شروع کر دی ہے۔ اسی پد یاترا میں شرکت کیلئے راہول گاندھی بہار پہنچے ہیں۔اس دوران کانگریس پارٹی کی طرف سے سوشل میڈیا پر لکھا گیا کہ آج راہل گاندھی نے ’پلاین روکو، نوکری دو یاترا‘ میں قدم سے قدم ملا کر یاترا کے پیغام کو مضبوطی کے ساتھ عوام تک پہنچایا ہے ۔ بہار کے نوجوانوں کو نقل مکانی نہیںکرنی پڑے گی، انہیں خود کی ریاست میں روزگار ملے۔ یہ ہماری یاترا کا نشانہ ہے۔ یہ یاترا بہار کے جدوجہد کی آواز اور امید ہے۔ ہم برسوں سے ناانصافی جھیل رہے ہیں۔ ریاست کے نوجوانوں کو ’انصاف کا حق‘ دلا کر رہیں گے۔پد یاترا کے دوران راہول گاندھی کے ساتھ ہزاروں کی تعداد میں کانگریس کے قائدین، کارکنوں اور حامیوں نے قدم سے قدم ملا کر طویل فاصلہ طے کیا۔ اس دوران راہول نے لوگوں کا استقبال قبول کرتے ہوئے ہاتھ اوپر اٹھا کر ان کا شکریہ کیا۔ ساتھ میں کنہیا کمار بھی پْرجوش دکھائی دئے۔بیگوسرائے کے آئی ٹی آئی میدان سے ’پلاین روکو، نوکری دو‘ پد یاترا شروع ہوئی۔ اس میں کانگریس کارکنان کی کافی بھیڑ نظر آ رہی ہے۔ راہول گاندھی پد یاترا میں شامل ہونے کے بعد دوپہر ایک بجے جوبلی ڈھابہ کے قریب کنہیا کمار نے پریس کانفرنس کی۔ راہول گاندھی کی پد یاترا کو لے کر بیگوسرائے میں کانگریس کارکنان میں کافی جوش دیکھا گیا۔ اس طرح بہار الیکشن کیلئے کانگریس کی مہم کا عملاً آغاز ہوچکا ہے ۔
