نئی دہلی۔11 جون (سیاست ڈاٹ کام) لوک سبھا سیکریٹریٹ نے ارکان پارلیمان کی ایک فہرست جاری کی ہے جنہیں اپنا بنگلہ خالی کر نا ہے، اس فہرست میں کانگریس پارٹی کے صدر راہول گاندھی کی سرکاری رہائش گاہ 12، تغلق لین کا نام بھی شامل ہے۔راہول گاندھی کے پاس یہ رہائش گاہ 2004ء سے ہے جب وہ پہلی مرتبہ امیٹھی سے لوک سبھا انتخابات جیت کر آئے تھے۔سرکولر کی ایک نقل خبر رساں ادارہ اے این آئی کے پاس بھی ہے۔ جس میں ان رہائش گاہوں کا نام ہے جو نئے ارکان پارلیمان کو دئے جائیں گے۔ راہول گاندھی کی یہ رہائش گاہ ٹائپ 8 زمرے کی ہے جس کا شمار عظیم ترین رہائش گاہوں میں ہوتا ہے۔حالیہ لوک سبھا انتخابات میں راہول گاندھی اپنی روایتی سیٹ امیٹھی سے تو ہار گئے ہیں، لیکن انہیں کیرلا کے ویاناڈ سے کامیابی ملی ہے۔ضابطے کے مطابق، لوک سبھا سیکریٹریٹ ارکان پارلیمان کو خالی رہائش گاہ اور فلیٹ کی ایک فہرست دیتا ہے۔
