نئی دہلی، 22 اکتوبر (یو این آئی) بہار اسمبلی انتخابات میں انڈیا اتحاد کی جانب سے انتخابی مہم کی تیاریاں زور و شور سے جاری ہیں۔ کانگریس نے اپنے اسٹار پرچارکوں، سابق صدر راہول گاندھی اور رکن پارلیمنٹ پرینکا گاندھی واڈرا کی جلسہ عام سے متعلق شیڈول کو حتمی شکل دینا شروع کر دیا ہے ۔ بہار اسمبلی انتخابات میں وزیر اعظم نریندر مودی کے علاوہ بی جے پی کے دیگر بڑے لیڈر بھی انتخابی مہم میں سرگرم ہیں۔ وزیر اعلیٰ نتیش کمار نے منگل کو مظفرپور میں دو جلسوں سے خطاب کرتے ہوئے اپوزیشن پر سخت تنقید کی۔ ذرائع کے مطابق چھٹھ پوجا کے بعد راہول گاندھی اور پرینکا گاندھی بہار میں انتخابی مہم شروع کریں گے اور اسی کو مدنظر رکھتے ہوئے دونوں رہنماؤں کے جلسوں اور ریلیوں کا شیڈول تیار کیا جا رہا ہے ۔ انڈیا اتحاد کی مشترکہ ریلیوں کو بھی حتمی شکل دی جا رہی ہے ۔ کانگریس ذرائع نے بتایا کہ راہول گاندھی کی پہلی ریلی چھٹھ پوجا کے بعد منعقد ہوگی۔ وہ شمالی بہار کے کسی بڑے ضلع سے اپنی مہم کا آغاز کریں گے ۔ پارٹی کی حکمتِ عملی کے مطابق راہول گاندھی پہلے مرحلے کے انتخابات میں ان علاقوں میں ریلیاں کریں گے جہاں کانگریس امیدوار مضبوط پوزیشن میں ہیں۔ ساتھ ہی وہ دوسرے کانگریس ارکانِ اسمبلی کے حلقوں میں بھی انتخابی تشہیر کریں گے ۔ مظفرپور، ویشالی، دربھنگہ، مدھوبنی، سیتامڑھی، مشرقی چمپارن اور مغربی چمپارن کے اضلاع میں راہول گاندھی اور پرینکا گاندھی کی ریلیاں اور روڈ شوز انتخابی مہم کو رفتار دیں گے اور عوام تک پارٹی کا پیغام زیادہ مؤثر انداز میں پہنچائیں گے۔
انتخابی مہم کیلئے پرینکا گاندھی کی ریلیوں اور روڈ شوز کا بھی شیڈول طے کیا جا رہا ہے ۔ پارٹی ذرائع کے مطابق وہ خواتین اور نوجوانوں سے متعلق مسائل پر ریلیوں سے خطاب کریں گی۔ وہ بہار میں خواتین کے حقوق، وظیفے ، تحفظ اور صحت بیمہ جیسے اہم موضوعات کو اٹھا سکتی ہیں۔ قابلِ ذکر ہے کہ بہار اسمبلی انتخابات کے پہلے مرحلے میں 6 نومبر کو 18 اضلاع کی 121 اسمبلی نشستوں پر ووٹنگ ہونی ہے ، جب کہ 11 نومبر کو دوسرے مرحلے کی پولنگ ہوگی۔
