ہائی کورٹ کی ہدایت، آدھار اور کاسٹ تفصیلات کے بغیر جائیدادوں کا رجسٹریشن کیا جائے
حیدرآباد: تلنگانہ ہائی کورٹ میں غیر زرعی جائیدادوں اور اراضیات کے رجسٹریشن کے سلسلہ میں اہم فیصلہ سناتے ہوئے رجسٹریشن کے طریقہ کار سے آدھار کی تفصیلات کو حذف کرنے کی ہدایت دی۔ عدالت نے کہا کہ سافٹ ویر میں آدھار کی تفصیلات سے متعلق کالم کو نکالنے تک سلاٹ بکنگ کو روک دیا جانا چاہئے ۔ ہائی کورٹ نے آدھار کے علاوہ کاسٹ اور ارکان خاندان کی تفصیلات سے متعلق کالم کو حذف کرنے کی ہدایت دی۔ حکومت کے موجودہ طریقہ کار کو چیلنج کرتے ہوئے داخل کردہ مفاد عامہ کی درخواستوں پر ہائی کورٹ نے آج مسلسل دوسرے دن سماعت کی ۔ عدالت نے کہا کہ غیر زرعی جائیدادوں اور اراضیات کے رجسٹریشن کا عمل جاری رکھا جائے ، تاہم آدھار اور دیگر تفصیلات طلب کرنے سے گریز کیا جائے۔ رجسٹریشن کے لئے دیگر شناختی دستاویزات کو قبول کیا جانا چاہئے ۔ عدالت نے کہا کہ حکومت نے عدالت کو دیئے گئے تیقن کی خلاف ورزی کی ہے۔ عدالت نے کہا کہ رجسٹریشن کیلئے تفصیلات کے حصول پر اعتراض نہیں لیکن عوام کی نجی معلومات حاصل کرنا غیر محفوظ طریقہ کار ہے۔ ہائی کورٹ نے سافٹ ویر اور مینول میں تبدیلی کرتے ہوئے ہائی کورٹ کو رپورٹ پیش کرنے کی ہدایت دی۔ اس معاملہ کی آئندہ سماعت 20 جنوری تک ملتوی کی گئی۔ قبل ازیں چہارشنبہ کو تلنگانہ ہائی کورٹ نے غیر زرعی جائیدادوں اور اراضیات کے رجسٹریشن کے سلسلہ میں حکومت پر عدالت کو گمراہ کرنے کا الزام عائد کرتے ہوئے سخت ریمارکس کئے ہیں۔ عدالت نے کہا کہ حکومت عدالت میں ایک بات کہہ رہی ہے جبکہ عمل آوری میں کچھ اور ہے۔ ہائی کورٹ نے کہا کہ ریاستی حکومت کچھ زیادہ ہی چالاکی اور ہوشیاری کا مظاہرہ کر رہی ہے۔ درخواست گزاروں کے وکلاء نے شکایت کی کہ جائیدادوں کا رجسٹریشن پرانے طریقہ کار سے انجام نہیں دیا جارہا ہے، حالانکہ اس سلسلہ میں ہائی کورٹ نے ہدایت دی تھی ۔ حکومت کی ہدایت کے باوجود جائیداد مالکین سے آدھار اور دیگر تفصیلات طلب کی جارہی ہے۔
اراضی کی منتقلی کیلئے شرحوں کا تعین
حیدرآباد: حکومت نے زرعی اراضی کو غیر زرعی اراضی کے طور پر منتقل کرنے کے لئے ٹیکس کی شرحوں کا از سر نو تعین کیا ہے ۔ اس سلسلہ میں چیف سکریٹری سومیش کمار نے احکامات جاری کئے جن پر فوری اثر کے ساتھ عمل آوری ہوگی۔ گریٹر حیدرآباد میونسپل کارپوریشن کے حدود میں ٹیکس اراضی کی بنیادی مالیت کا دو فیصد مقرر کیا گیا ہے جبکہ اضلاع میں اراضی کی غیر زرعی اغراض کیلئے استعمال پر 3 فیصد ٹیکس عائد کیا جائے گا۔ حکومت نے اراضی کی زرعی مقاصد سے غیر زرعی امور کیلئے منتقلی سے متعلق قانون پر عمل آوری کے احکامات علحدہ جاری کئے۔