حیدرآباد 21 جولائی (ایجنسیز) تیلگو سوپر اسٹار رام چرن کی فلم پیڈی کی کامیابی کے بعد اطلاعات ہیں کہ وہ معروف فلم ساز سوکومار کے ساتھ ایک بار پھرفلم کر رہے ہیں۔ دونوں کی آئندہ فلم کو ایک بڑے بجٹ کی ایکشن انٹرٹینرکے طور پر پیش کیا جا رہا ہے، جس نے فلمی دنیا میں ابھی سے خاصی توجہ حاصل کرلی ہے۔ سب سے زیادہ قیاس آرائیاں اس بات پر ہو رہی ہیں کہ فلم میں رام چرن کے مقابل مرکزی اداکارہ کا کردار کون ادا کرے گی۔رپورٹس کے مطابق پشپا کی اداکارہ رشمیکا مندانا اس کردار کے لیے فلم سازوں کی پہلی پسند ہیں۔ رشمیکا نے ہندوستانیسنیما میں اپنی مضبوط شناخت قائم کرلی ہے اور اس وقت ان کے پاس کئی بڑے منصوبے بھی موجود ہیں۔ تاہم، ان کا مصروف شیڈول اس فلم کے لیے فوری طور پر تاریخیں دینے میں رکاوٹ بن سکتا ہے۔رشمیکا کی دستیابی یقینی نہ ہونے کے باعث فلم ساز دیگر اداکاراؤں کے ناموں پر بھی غورکررہے ہیں۔ اطلاعات کے مطابق اداکارہ رْکمِنی وسنتھ نے اس کردار کے لیے لک ٹسٹ دیا ہے اور فلم کی ٹیم انہیں سنجیدگی سے زیر غور لارہی ہے۔ جنوبی سنیما میں اپنی اداکاری سے شناخت بنانے والی رْکمِنی کا شمار ان نوجوان اداکاراؤں میں کیا جاتا ہے جن سے مستقبل میں بڑی توقعات وابستہ ہیں۔دوسری جانب بالی ووڈ اداکارہ کریتی سینن کا نام بھی مرکزی اداکارہ کے کردار کے ممکنہ امیدواروں میں شامل بتایا جا رہا ہے۔ اگر کریتی سینن اس فلم کا حصہ بنتی ہیں تو اس سے فلم کی پین انڈیا اپیل میں مزید اضافہ ہوسکتا ہے، خاص طور پر رام چرن کی ملک بھر میں بڑھتی ہوئی مقبولیت کے پیش نظر۔فلم کو ایک زبردست اور ہائی آکٹین، دو حصوں پر مشتمل ایکشن انٹرٹینر قرار دیا جا رہا ہے۔ اس سے اندازہ ہوتا ہے کہ سوکومار اور رام چرن ایک بار پھر بڑے پیمانے پر ایک شاندار سنیما تجربہ پیش کرنے کی تیاری کر رہے ہیں۔ اگرچہ فلم کی کہانی، مکمل کاسٹ اور پروڈکشن شیڈول سے متعلق باضابطہ تفصیلات ابھی سامنے نہیں آئی ہیں، تاہم دونوں کی گزشتہ کامیاب شراکت داری کے باعث شائقین کی توقعات پہلے ہی کافی بڑھ گئی ہیں۔
