تہران ؍ واشنگٹن ۔ 3 جنوری (ایجنسیز) ایران کے سابق شاہ کے بیٹے رضا پہلوی نے امریکی صدر ڈونالڈ ٹرمپ کے ایران سے متعلق بیان کا خیر مقدم کیا ہے۔ سوشل میڈیا پر جاری بیان میں صدرٹرمپ کا شکریہ ادا کرتے ہوئے رضا پہلوی کا کہنا تھا کہ ڈونالڈ ٹرمپ کا بیان ایرانی عوام کے لیے مزید طاقت اور اْمید ہے۔ انہوں نے کہا کہ آخر کار،امریکہ کا ایک صدر مضبوطی سے ان کے شانہ بشانہ کھڑا ہے۔ رضا پہلوی کا کہنا تھا کہ ان کے پاس ایران کے لیے مستحکم منتقلی کا منصوبہ ہے اور اسے پورا کرنے کے لیے عوام کی حمایت بھی حاصل ہے۔ واضح رہے کہ گزشتہ روز امریکی صدر ڈونالڈ ٹرمپ نے ایران کی صورتحال پر اپنے بیان میں کہا تھا کہ اگر ایران میں مزید مظاہرین مارے گئے توامریکہ مداخلت کے لیے تیار ہے۔ صدر ٹرمپ نے سوشل میڈیا پر جاری کیے گئے اپنے بیان میں کہا تھا کہ امریکہ پْرامن مظاہرین کو بچانے کے لیے ایران جا سکتا ہے۔