دبئی ۔ ورلڈ کپ میں سری لنکا کے خلاف شاندار فتح کے بعد پاکستان کرکٹ ٹیم کے وکٹ کیپر محمد رضوان کے ٹوئٹ پر انٹرنیشنل کرکٹ کونسل (آئی سی سی ) کا مؤقف سامنے آ گیا۔ آئی سی سی نے کہا ہے کہ سری لنکا کے خلاف پاکستان کی جیت کے بعد غزہ سے متعلق محمد رضوان کیاٹوئٹ ان کے دائرہ اختیار سے باہر ہے۔ برطانوی میڈیا کے مطابق آئی سی سی کے ترجمان نے اس حوالے سے کہا ہے کہ یہ کھیل کے میدان اور آئی سی سی کے دائرہ اختیار سے باہر ہے۔ ترجمان آئی سی سی نے کہا ہے کہ فرد اور ان کے بورڈ پر منحصر ہے کہ وہ اپنے انفرادی پلیٹ فارم کو کس طرح استعمال کرنا چاہتے ہیں۔ یاد رہے کہ پاکستان کرکٹ ٹیم کے وکٹ کیپر محمد رضوان نے سری لنکا کے خلاف 131 رنزکی ناقابلِ شکست اننگز اور ٹیم کی شاندار فتح کو غزہ کے نام کیا ۔ایکس پر پوسٹ شائع کرتے ہوئے رضوان نے پاکستان کی جیت پر اظہارِ خیال کیا تھا اور اسے اسرائیل کی وحشیانہ کارروائیوں کا نشانہ بننے والے معصوم فلسطینیوں کے نام کر دیا تھا۔
