نتیش کمار اور این ڈی اے قائدین کو بہار کی ترقی مطلوب ۔ اپوزیشن کو خاندانی بھلائی کی فکر
بیگوسرائے ، 24 اکتوبر (یو این آئی) وزیراعظم نریندر مودی نے جمعہ کو بیگوسرائے کی سرزمین پر بہار کے پہلے وزیر اعلیٰ شری کرشن سنگھ کے دور میں علاقے میں ہوئی صنعتی ترقی کو یاد کرتے ہوئے نعرہ دیا، “رفتار سے چلے گا بہار، جب پھر آئے گی ‘این ڈی اے ‘ سرکار”۔ مودی نے آج عوامی اجتماع سے خطاب کرتے ہوئے بیگوسرائے کے فخر، قومی شاعر رام دھاری سنگھ ‘دنکر’ اور شہر کی بہو شاردا سنہا کو یاد کیا۔ انہوں نے کہا کہ ان کے گائے ہوئے چھٹھ پوجا کے گیت امر ہیں اور قومی جمہوری اتحاد (این ڈی اے ) کی حکومت نے ہی انہیں پہلے پدم بھوشن اور بعد میں پدم وبھوشن ایوارڈ سے نوازا تھا۔ انہوں نے بہار کے پہلے وزیر اعلیٰ شری کرشن سنگھ کو یاد کرتے ہوئے کہا کہ ان کے ویژن سے بیگوسرائے ایک وقت میں ملک کا اہم صنعتی شہر بن گیا تھا اور یہاں برونی آئل ریفائنری کے ساتھ کھاد کا بھی کارخانہ قائم کیا گیا۔ انہوں نے کہا کہ بعد کے دنوں میں کانگریس۔آر جے ڈی حکومت کی لاپرواہی کے باعث کھاد کا کارخانہ خستہ حال ہو گیا۔ انہوں نے کہا کہ ان کی حکومت کے دوران ‘پی ایم ارجا گنگا یوجنا’ بنا کر بنگال سے اس کارخانے کیلئے پائپ لائن کے ذریعے گیس فراہم کی گئی۔ انہوں نے کہا کہ ان نئے تغیرات سے بیگوسرائے میں نوجوانوں کیلئے روزگار کے مواقع بڑھ رہے ہیں۔ انہوں نے کہا کہ صرف بیگوسرائے ہی نہیں بلکہ “رفتار سے چلے گا بہار، جب پھر آئے گی این ڈی اے سرکار”۔ وزیراعظم مودی نے کہا کہ بھارتیہ جنتا پارٹی کے صدر دلیپ جیسوال، دونوں نائب وزیراعلیٰ سمراٹ چودھری اور وجے سنہا، وزیراعلیٰ نتیش کمار اور این ڈی اے کے دیگر اتحادی جماعتوں کے قائدین مسلسل بہار کی ترقی کے بارے میں سوچتے ہیں، جبکہ آر جے ڈی، کانگریس اور ان کے رہنما صرف اپنے خاندان کے بھلے کی فکر کرتے ہیں۔