ریاض :صدارت عامہ برائے امور مسجد الحرام و مسجد نبویؐ کے سربراہ الشیخ ڈاکٹر عبدالرحمن بن عبدالعزیز السدیس نے اعلان کیا کہ رمضان المبارک کی بابرکت ساعتوں میں مسجد حرام اور مسجد نبویؐ میں لاکھوں فرزندان توحید کی آمد کے لیے تیاری کرلی گئی ہے۔ مسجد حرام اور مسجد نبویؐ میں زائرین، معتمرین اور عبادت گزاروں کو سہولتیں فراہم کرنے کی تیاری کرلی گئی ہے۔ انہوں نے مزید کہا کہ رمضان المبارک کے مقدس مہینے کے لیے جنرل پریذیڈنسی کی تیاریوں کے حصے کے طور پر معتمرین کے لیے تمام خدمات کی تیاریاں کر لی گئی ہیں۔ڈاکٹر عبد الرحمن السدیس نے کہا کہ دونوں مقدس مساجد میں عازمین کو فراہم کی جانے والی تمام خدمات مکمل طور پر تیار ہیں۔ تمام سیڑھیوں اور لفٹوں کو کارکرد کردیا گیا ہے۔ مساجد کے تمام حصوں میں ساؤنڈ سسٹم، تمام تکنیکی سروس، انجینئرنگ۔ آگاہی اور رہنمائی کی خدمات ایک خصوصی ٹیم کے ذریعہ تیار ہیں۔ ان سرویسز کی مانیٹرنگ بھی کی جارہی ہے۔ جدید ترین ٹکنالوجی کا استعمال کرتے ہوئے سعودی حکومت دونوں مقدس مساجد میں بہتر سہولیات فراہم کرنے کیلئے کمر بستہ ہے۔
بہتر سے بہتر خدمات کی فراہمی کی اس تیاری میں تمام محکموں اور یونٹوں کے ساتھ ان کی معاون ایجنسیوں نے حصہ لیا ہے۔شیخ سدیس نے کہا جنرل پریذیڈنسی متعلقہ حکام کے ساتھ مسلسل روابط قائم کرکے ضیوف الرحمن کو خدمات فراہم کرنے اور ان کی عبادات کی ادائیگی میں سہولت فراہم کرنے کی پوری سعی کرتا ہے۔الشیخ السدیس نے اپنی تقریر ختم کرتے ہوئے ضیوف الرحمن کی خدمت میں مصروف افراد اور سعودی قیادت کے لیے مدد اور کامیابی کی دعا بھی کی۔
