ممبئی ، 29 ستمبر (ایجنسیز) بالی ووڈ میں کپور خاندان کی چوتھی نسل کی قیادت کرنے والے اداکار رنبیر کپور نے اپنے آبا و اجداد کا نام روشن کیا۔ 43 سالہ رنبیر کے پردادا پرتھوی راج کپور، دادا راج کپور اور معروف بالی ووڈ اداکار رشی کپور ان کے والد اور اداکارہ نیتو کپور ان کی والدہ ہیں۔ رنبیر نے اپنے کرئیر کا آغاز 2007ء میں فلم ’ساوریا‘ سے کیا جس میں انھوں نے ایک ایسا کردار ادا کیا جو اپنی زندگی کو کھل کر جینا پسند کرتا ہے،وہ بتاتا ہے کہ اسے جو بُرا لگتا ہے اس کے بارے میں بولنے سے وہ ہچکچاتا نہیں ہے۔ رنبیرنے 2008ء میںفلم ’بچنا اے حسینو‘ میں نہ صرف نوجوانوں میں اہم مقام بنایا بلکہ انہوں نے لڑکیوں کے دلوں کو بھی دھڑکائے بغیر نہیں چھوڑا۔ اس کے بعد رنبیر نے فلم’لک بائی چانس‘ میں مزاحیہ کردار ادا کرنے میں کوئی ہچکچاہٹ محسوس نہیں کی۔ فلم ’ویک اپ سڈ‘ سے رنبیر کالج جانے والے لڑکوں اور لڑکیوں کیلئے رول ماڈل بن گئے۔ اس کے بعد2009ء کی فلم ’عجب پریم کی غضب کہانی‘ میں رنبیر ہیپی کلب کے صدر کے طور پر کول اور معصوم نظر آئے، جو فلم کی ہیروئن جینی (کٹرینہ کیف) کا دل جیتنے میں کامیاب نہ ہو سکے۔ اس فلم کیلئے رنبیر کو ایک بار پھر بہترین اداکار کے طور پر نامزد کیا گیا تھا۔ 2009ء ہی میں فلم ’راکٹ سنگھ: سیلز مین آف دی ایئر‘ میں رنبیر نے ایک کم عقل لیکن اپنے مسائل کو قسمت کہنے کے بجائے لڑنے کی صلاحیت رکھنے والے نوجوان کا کردار ادا کیا تھا۔رنبیر کو’ویک اپ سڈ‘،’عجب پریم کی غضب کہانی‘ اور’راکٹ سنگھ‘میں ان کی اداکاری کیلئے لگاتار فلم فیئر کریٹکس ایوارڈ سے نوازا گیا۔ اس سب کے درمیان فلم ’راک اسٹار‘ میں رنبیر نے ثابت کیا کہ ان کا کوئی ثانی نہیں ہے۔ رنبیر جتنے جذبے سے اداکاری کرتے ہیں اتنا ہی جذبہ رکھنے والے عاشق بھی ہیں، جسے اپنی منزل حاصل کرنے سے کوئی نہیں روک سکتا۔ فلم ’برفی‘میں رنبیر نہیں بلکہ ان کی اداکاری کا بول بالا رہا۔ رنبیر کو دیکھ کر لگتا ہے جیسے انہیں اداکاری ورثے میں ملی ہے۔ رنبیر وہ شخص ہے جس نے نہ صرف اپنے والدین کو عزت دی بلکہ یہ بھی ثابت کیا کہ کپور خاندان میں اداکاری رچی بسی ہوئی ہے۔ ویسے رنبیر کی تایازاد بہنوں کرشمہ کپور اور کرینہ کپور نے ان سے قبل بالی ووڈ میں قدم رکھا اور کامیاب ہوئیں۔ رنبیر کپور کی شادی بالی ووڈ کی معروف اداکارہ اور مہیش بھٹ اور سونی رازدان کی صاحبزادی عالیہ بھٹ سے ہوئی ہے۔ ان کی ایک بیٹی ہے۔ رنبیر کی دیگر فلموں میں برہماستر، اینیمل، جوانی دیوانی، اے دل ہے مشکل، سنجے دت کی بایو پک سنجو، شمشیرا، تماشہ، بے شرم، انجانہ انجانی، روئے شامل ہیں۔
