کیف ۔ 23 اگست (ایجنسیز) یوکرین کے صدر ولادیمیر زیلنسکی کا کہنا ہے کہ روس امن سے متعلق اجلاس کو روکنے اور جنگ کو طول دینے کی کوشش کر رہا ہے۔ زیلنسکی نے اپنے بیان میں کہا کہ روس کی جانب سے ان کی اور صدر پوٹن کی ملاقات روکنے کی ہرممکن کوشش کی جا رہی ہے، روس کی طرح یوکرین مختلف رہنماؤں سے ملاقات کرنے سے ڈرتا نہیں ہے۔ ان کا کہنا تھا کہ وہ چاہتے ہیں کہ یوکرین کی حفاظتی ضمانتیں ناٹو کے آرٹیکل 5 کی عکاسی کریں جو اتحاد کے ایک رکن پر حملے کو ناٹو کے تمام ارکان پر حملہ تصور کرتا ہے۔ دوسری جانب روسی وزیرِ خارجہ سرگئی لاروف کا کہنا ہے کہ پوٹن یوکرین کے رہنما سے ملاقات کا ایجنڈہ طے ہو جانے کے بعد ملاقات کریں گے اور یہ ایجنڈہ کبھی بھی تیار نہیں ہو گا کیونکہ صدر زیلنسکی ہر چیز کے لیے انکار کرتے ہیں۔
