25 مئی کو اسلام آباد لانگ مارچ کا اعلان ، قوم کے ہر شعبہ سے تعلق رکھنے والوں کو دعوت
پشاور : پاکستان کے سابق وزیر اعظم عمران خان نے پشاور میں کورکمیٹی کے اجلاس کے بعد پریس کانفرنس کرتے ہوئے کہا کہ کور کمیٹی اجلاس میں لانگ مارچ کا فیصلہ کرلیا گیاہے،صرف تحریک انصاف کے کارکنوں کو نہیں بلکہ ساری قوم کو ہر شعبے سے تعلق رکھنے والے افراد کو دعوت دی جارہی ہے کہ لانگ مارچ میں شرکت کریں اور یہ تمام لوگ سرینگر ہائی وے پر 25 مئی کو اکٹھا ہوں گے۔ چیئرمین تحریک انصاف عمران خان کا کہنا تھا کہ 2018 میں ہمیں ملک دیوالیہ ملا تھا۔ہم نے پٹرول پر سبسڈی بھی دی تھی، اب روپیہ گرا ہے، اس کا اثر بجلی اور پٹرول کی قیمت پر پڑے گا، باہر سے منگوانے والی چیزوں پر اثر پڑے گا، بتایا گیا تھا کہ تجربہ کار لوگ ہیں لیکن ان کے پاس نہ منصوبہ ہے اور نہ کچھ کرنے کی ہمت، کوئی روڈ میپ ہے اور نہ پلان، ان کا تجربہ صرف کرپشن کرنے اور کرپشن کیسز ختم کرنے میں ہے۔ پاکستان کے سابق وزیراعظم نے کہا کہ امریکہ کی زیرقیادت کواڈ اتحاد کا اہم رکن ہونے کے باوجود ہندوستان ، روس سے ڈسکاونٹ پر تیل کی خریداری کررہا ہے جو قابل ستائش ہے۔ امریکہ کے دباؤ کے باوجود عوام کو راحت دینے کیلئے ہندوستان نے یہ قدم اٹھایا۔ روس سے تیل حاصل کرنے کے بعد حکومت ہند نے پٹرول کی قیمت میں فی لیٹر 9.5 روپئے اور ڈیزل کی قیمت میں 7 روپئے فی لیٹر کی کمی کی ہے۔ اپنے ایک ٹویٹ میں عمران خان نے دعویٰ کیا کہ ان کی حکومت کیلئے پاکستان کا مفاد سب سے اہم تھا لیکن بدبختی سے میرجعفر اور میرصادق بیرونی دباؤ کے آگے جھک گئے۔ عمران خان کا کہنا تھا کہ ہمارے خلاف سازش کا آغاز گذشتہ سال جون میں ہوا، یہ سازش میرے خلاف نہیں پاکستان کے خلاف کی گئی۔ان کا کہنا تھا کہ مارچ پرامن ہوگا، اگر کارروائی کی گئی تو یہ غیر قانونی ہوگا ہم اس کے خلاف ایکشن لیں گے، مجھے بتایا گیا ہے کہ دو دن قبل انٹرنیٹ بند ہوجائے گا، پٹرول ، ڈیزل اور ٹرانسپورٹ بند ہوگی۔ ہمارا مطالبہ اسمبلیاں تحلیل کرنا اور الیکشن کی تاریخ ہے۔