ماسکو ۔ 24 اکٹوبر (ایجنسیز) روسی صدر ولادیمیر پوٹن نے امریکہ کی نئی پابندیوں پر سخت ردِعمل دیتے ہوئے کہا ہے کہ روس کبھی بھی امریکی دباؤ کے آگے نہیں جھکے گا۔ صدر پوٹن نے کہا کہ امریکہ کے غیر دوستانہ اقدامات روس اور امریکہ کے تعلقات کو مزید کمزور کردیں گے۔ ان کے بقول، کوئی خوددار ملک دباؤ میں آ کر فیصلے نہیں کرتا۔پوٹن نے تسلیم کیا کہ واشنگٹن کی نئی پابندیاں روسی معیشت پر کچھ اثر ڈال سکتی ہیں، تاہم انہوں نے واضح کیا کہ روس اپنی پالیسیوں پر قائم رہے گا اور بیرونی دباؤ کے باوجود خودمختاری سے فیصلے کرے گا۔امریکہ نے گزشتہ روز روس کی دو بڑی آئل کمپنیوں روزنیفٹ اور لک آئل پر نئی پابندیاں عائد کی ہیں تاکہ کریملن کو یوکرین جنگ ختم کرنے پر مجبور کیا جا سکے۔ امریکی حکام کا کہنا ہیکہ ان اقدامات سے روس پر معاشی دباؤ بڑھے گا اور صدر پوٹن کو مذاکرات کی میز پر لانے میں مدد ملے گی۔
