ماسکو : روس نے یوکرائن کی سرحد سے 10 ہزار فوجی واپس بلالیے،جس کے بعد علاقے میں ایک ماہ سے جاری فوجی مشقیں بھی ختم ہو گئیں۔ خبررساں اداروں کے مطابق روسی وزارت دفاع کی جانب سے کہا گیا ہے کہ یوکرائن کی سرحد پر تعینات فوجیوں کو واپس بلا لیا ہے۔ روسی افواج کو یوکرائن کی سرحد کے ساتھ کریمیا روسٹو میں تعینات کیا گیا تھا۔واضح رہے کہ یوکرائن کی سرحد پر تعینات روسی افواج کی تعیناتی سے روس کی مغربی ممالک کے ساتھ کشیدگی میں اضافہ ہوا تھا۔ امریکہ نے فوجی کشیدگی کی صورت میں روس پر سخت پابندیوں کا عندیہ دیا تھا۔ چند روز قبل روسی صدر پیوٹن نے کہا تھا کہ امریکہ اور ناٹو ضمانت دیں تو روس یوکرائن سے متعلق پالیسی پر نظر ثانی کر سکتا ہے،تاہم یوکرائن کی حکومت سے کوئی بات چیت نہیں ہو سکتی۔یاد رہے کہ امریکی وزارت دفاع کی جانب سے مختلف بیانات میں الزام عائد کی گیا تھا کہ روس نے یوکرائن کی سرحد پر ایک لاکھ سے زائد فوجی تعینات کررکھے ہیں۔
