ریاض : سعودی وزیر خارجہ شہزادہ فیصل بن فرحان نے اس بات کی تصدیق کرتے ہوئے کہا کہ ہم روس یوکرین جنگ کو مذاکرات کے ذریعہ ختم کرنے کا امکان دیکھ رہے ہیں۔ انہوں نے سوئٹزرلینڈ میں ڈیووس اکنامک کانفرنس کے موقع پر امریکی ویب سائٹ بلومبرگ کو انٹرویو دیتے ہوئے کہا کہ مملکت تیل کی قیمت کو نسبتاً مستحکم رکھنے کیلئے روس کیساتھ مل کر کام کر رہی ہے۔ انہوں نے اس بات پر بھی زور دیا کہ امریکہ خطہ میں سب سے زیادہ فعال سیکورٹی پارٹنر ہے۔ اس کے علاوہ سعودی وزیر نے بلومبرگ کیساتھ انٹرویو میں کہا کہ کہ چین سعودی عرب کیلئے ایک اہم تجارتی پارٹنر ہے۔ شہزادہ فیصل نے فلسطینی ریاست کے قیام کا مطالبہ کرتے ہوئے کہا کہ خطہ میں استحکام فلسطینیوں کو امید دلانے سے حاصل ہوگا۔ انہوں نے مزید کہا کہ فلسطینیوں کو ان کی اپنی ریاست دیکر انہیں عزت دی جانی چاہئے۔ انہوں نے شام کے معاملے پر بھی بات چیت کی اور کہا کہ ہمیں شام کے بحران کا سیاسی حل تلاش کرنے کیلئے کام کرنا چاہئے۔
