ریاض، 24 اگست (ایجنسیز) پرتگال سے تعلق رکھنے والے عالمی شہرت یافتہ فٹبالر کرسٹیانو رونالڈو کا ٹیم کی جیت کیلئے مسلمانوں کی طرح دعا مانگتے ہوئے ویڈیو کلپ سوشل میڈیا کی زینت بنا ہوا ہے۔ وائرل کلپ میں رونالڈو کو پنالٹی شوٹ آؤٹ کے دوران دعا کرتے ہوئے جا سکتا ہے۔ یہ میچ سعودی کلب النصر اور الاہلی کے درمیان کھیلا گیا۔ ویڈیو میں فٹبالر کو پنالٹی کِک سے قبل اپنی کامیابی کیلئے مسلمانوں کی طرح دعا کرتے دیکھا گیا جس کے بعد مداحوں نے ان کی عاجزی اور احترام کو سراہا۔ تصاویر اور ویڈیو سوشل میڈیا پلیٹ فارمس پر تیزی سے پھیل گئیں اور ہزاروں صارفین نے اپنے ردعمل کا اظہار کرتے ہوئے کہا کہ رونالڈو نہ صرف ایک عظیم کھلاڑی ہیں بلکہ مختلف مذاہب اور ثقافتوں کا احترام بھی کرتے ہیں۔ رونالڈو جو النصر کلب کی نمائندگی کر رہے ہیں، پہلے ہی مشرقِ وسطیٰ میں اپنی فٹبال پرفارمنس اور سادگی کے باعث بے حد مقبول ہیں، اس واقعہ نے ان کی مقبولیت کو مزید بڑھا دیا ہے۔ اس سے قبل یوئیفا نیشنز کپ کے فائنل میں سنسنی خیز مقابلے کے دوران بھی کرسٹیانو رونالڈو کو اپنی نیشنل ٹیم کیلئے مسلمانوں کی طرح دعا مانگتے ہوئے دیکھا گیا تھا۔
