راجکوٹ۔ 18 جنوری (سیاست ڈاٹ کام) ہندوستانی اوپنر روہت شرما نے آسٹریلیا کے خلاف راجکوٹ میں بطور اوپنر سب سے تیز 7000 رنز پورے کر لیے اور اس معاملے میں وہ ہاشم آملہ اور سچن تندولکر سے بھی آگے نکل گئے ہیں۔روہت نے ہندستانی اننگز میں 42 رنزبنائے جس کے ساتھ ان کے ونڈے میں 8996 رنز ہو گئے ہیں۔ یہ ان کا 223 واں ونڈے تھا۔ روہت نے ایک اوپنر کے طور پر سب سے تیز رفتار 7000 رنز 137 اننگز میں پورے کئے ہیں جبکہ سابق کپتان سچن نے یہ کامیابی 160 اننگز میں حاصل کی تھی جو اب فہرست میں تیسرے مقام پر ہیں۔ جنوبی افریقہ کے اوپنرآملہ نے 147 اننگز میں سب سے تیز رفتار 7000 رن بنائے تھے اور وہ فہرست میں دوسرے نمبر پر آ گئے ہیں۔ نائب کپتان روہت چوتھے ہندستانی اوپنر ہیں جنہوں نے 7000 رنز کا یہ ہندسہ چھوا ہے۔
ان کے علاوہ سچن، گنگولی اور وریندر سہواگ کے نام یہ کامیابی درج ہے۔ 32 سالہ روہت ونڈے میں اپنے 9000 رنز کے ہندسے سے بھی اب صرف چاررنز دور ہیں۔
