نئی دہلی۔11 ستمبر (سیاست ڈاٹ کام ) بی سی سی آئی کے چیف سلیکٹر ایم ایس کے پرساد نے کہا ہے کہ لوکیش راہول کی موجودہ فارم ٹیم کے لئے مسئلہ کی وجہ بنتی جارہی ہے لہذا بورڈ روہت شرما کو اوپنر کے طور پر اتارنے پر غورکر رہا ہے۔راہول نے ویسٹ انڈیز کے خلاف کوئی خاص کارکردگی نہیں کی ہے۔ انہوں نے ویسٹ انڈیز کے خلاف دو ٹسٹ میچوں کی چار اننگز میں 44، 38، 13 اور 6 رنز بنائے تھے اور بڑی اننگز کھیلنے میں ناکام رہے ۔ پرساد نے ایک نیوز چینل سے کہاکہ ویسٹ انڈیز کے دورے کے بعد سلیکشن کمیٹی کے اجلاسنہیں ہوا ہے اور جب بھی ہم بحث کرنے کے لئے بیٹھیں گے اس وقت روہت کو ٹسٹ میں اوپنر کے طور پر کھلانے کے بارے میں غور کریں گے۔ انہوں نے کہاکہ اس میں کوئی شک نہیں کہ راہول ایک بہترین کھلاڑی ہے۔ فی الحال وہ ٹسٹ کرکٹ میں اپنی فارم کا شکار ہیں۔ ہم ان کی فارم سے فکر مند ہیں۔ انہیں کریز پر زیادہ سے زیادہ وقت تک ٹکے رہنا ہو گا اور اپنی فارم دوبارہ حاصل کرنی ہوگی۔غور طلب ہے کہ اس سے پہلے ٹیم کے سابق کپتان سورو گنگولی نے روہت کو ٹسٹ میں اوپنر کے طور پر کھیلانے کی مانگ کی تھی اور کہا تھا کہ انہیں اس فارمیٹ میں اوپنر کی حیثیت سے کھیلنے کا موقع ملنا چاہئے۔روہت نے اسی سال جولائی میں ہوئے آئی سی سی ورلڈ کپ میں شاندار کارکردگی کا مظاہرہ کرتے ہوئے ٹورنمنٹ میں پانچ سنچری بنائی تھیں۔
