نئی دہلی: بی جے پی پر دہلی میں روہنگیا کو آباد کرنے کا الزام لگاتے ہوئے ، عام آدمی پارٹی نے اتوار کو کہا کہ جیسے جیسے دہلی اسمبلی انتخابات قریب آرہے ہیں، بی جے پی پھر سے اپنی گندی سیاست پر اتر آئی ہے ۔آپ کے سینئر لیڈر منیش سیسودیا نے ایکس پر بی جے پی لیڈر اور مرکزی وزیر ہردیپ پوری کا ایک پرانا ٹویٹ شیئر کرتے ہوئے کہا جو اس بات کا ثبوت ہے کہ دہلی میں روہنگیا کو لانے اور بسانے کی سازش بی جے پی نے خود رچی ہے ۔ انہی لوگوں نے انہیں ای ڈبلیو ایس فلیٹ، سیکورٹی اور تمام سہولیات دے کر یہاں آباد کیا۔ سامنے سے نفرت پھیلاؤ اور روہنگیا کو پیچھے سے آباد کرو، یہ بی جے پی کی گندی اور دھوکہ دہی کی سیاست ہے ۔ دہلی والوں کو گمراہ کرنا بند کرو! تمہاری دوہری چالیں اب کام نہیں چلیں گی۔دہلی کے وزیر اعلیٰ آتشی نے کہا کہ بی جے پی والوں کو اروند کیجریوال پر جھوٹے الزامات لگانے کی اتنی جلدی تھی کہ انہیں یاد ہی نہیں رہا کہ روہنگیاؤں کو دہلی کون لایا، کس نے کہاں بسایا! لیکن سچ کی خاص بات یہ ہے کہ وہ ہمیشہ سامنے آتا ہے اور آج ہردیپ پوری کے اس ٹویٹ سے دہلی کے لوگوں کے سامنے سچائی آ گئی ہے ۔
