واشنگٹن،5نومبر(سیاست ڈاٹ کام) واشنگٹن حالیہ رکاوٹوں کے باوجود افغانستان میں سیاسی حل کے لیے پُرعزم ہے ۔ امریکہ کی جانب سے افغان امن عمل کی بحالی کی کوششوں کا مقصد دوستوں اور مخالفین کو اس بات کا یقین دلانا ہے ۔یہ بیان اس وقت جاری کیا گیا کہ جب امریکی نمائندہ خصوصی برائے افغانستان زلمے خلیل زاد نے امن مذاکرات کی بحالی کے لئے اپنی کوششیں مکمل کرلیں اور اس بات پر زوردیا گیا کہ واشنگٹن ‘‘افغانستان میں جنگ کے خاتمہ کے لئے سیاسی حل کی حمایت جاری رکھے گا’’۔ واضح رہے کہ ستمبر میں امریکہ اور طالبان 18 سال سے جاری جنگ کے خاتمہ کے لئے ایک معاہدہ طے کرنے کے قریب آگئے تھے لیکن طالبان کی جانب سے کابل میں کیے گئے حملے میں ایک امریکی فوجی سمیت 12 افراد کی ہلاکت نے ان کوششوں کا خاتمہ کردیا تھا۔اس وقت طالبان رہنماؤں اور افغان صدر اشرف غنی دونوں کی ملاقات امریکی صدر ڈونالڈ ٹرمپ کے ساتھ کابل میں طے تھی تاکہ معاہدے پر دستخط کئے جاسکیں تاہم امریکی صدر نے یہ ملاقات ان کی آمد سے چند گھنٹے قبل منسوخ کرتے ہوئے کہا تھا کہ مذاکرات صرف اس وقت بحال ہوں گے جب لڑائی روکی جائے گی۔بعدازاں انہوں نے 2 ہفتے قبل سفیر زلمے خلیل زاد کو امن عمل کے سلسلہ میں روانہ کیا تھا جس میں پہلے وہ یوروپی دارالحکومتوں میں گئے پھر جنوبی ایشائی خطے میں امریکی اتحادیوں سے اس بارے میں مشاورت کی کہ مذاکرات دوبارہ کس طرح شروع کئے جائیں۔
