حیدرآباد ۔ 22 نومبر (سیاست نیوز) ریاست میں گرام پنچایت انتخابات کی تیاریوں کا آغاز ہوگیا ۔ حکومت تین مرحلوں میں انتخابات کا عمل مکمل کرنے پر غور کررہی ہے۔ آج سرپنچ و وارڈ ممبرس تحفظات مختص کرنے احکام جاری کردیئے گئے ہیں۔ 25 نومبر کو کابینہ کا اجلاس طلب کیا گیا اور توقع کی ہیکہ 25نومبر کو گرام پنچایت انتخابات کیلئے الیکشن کمیشن سے اعلامیہ جاری کیا جائیگا۔ 32 آئی پی ایس افسروں کے تبادلوں کے بعد آئی اے ایس عہدیداروں کے تبادلوں کا امکان ہے۔ جوبلی ہلز انتخاب میں کامیابی کے بعد کانگریس کے حوصلے بلند ہیں۔ گرام پنچایت انتخابات کے انعقاد کیلئے تمام تیاریوں کو قطعیت دی گئی ہے۔ ڈیڈیکٹیڈ کمیشن کی دی گئی رپورٹ کو تلنگانہ کابینہ نے منظوری دی ہے جس کے بعد چیف سکریٹری رام کرشنا راؤ نے ریزرویشن کے طریقہ کار کو حتمی شکل دے کر جی او نمبر 46 جاری کردیا ہے۔
