حیدرآباد۔/16 جولائی، ( سیاست نیوز) صدر پردیش کانگریس ریونت ریڈی اور سی ایل پی لیڈر بھٹی وکرامارکا نے آج ہری باؤلی میں واقع اکنا مادنا مندر پہونچ کر بونال تہوار کے سلسلہ میں تقاریب میں حصہ لیا۔ مندر کمیٹی اور مقامی کانگریس قائدین نے ریونت ریڈی اور بھٹی وکرامارکا کا استقبال کیا۔ ریونت ریڈی نے عوام کو بونال تہوار کی مبارکباد پیش کی اور عوام کی بھلائی اور ریاست کی ترقی کیلئے نیک تمناؤں کا اظہار کیا۔ پرانے شہر کی ترقی میں کانگریس دور حکومت کے اقدامات کا حوالہ دیتے ہوئے ریونت ریڈی نے کہا کہ میٹرو ٹرین پراجکٹ کانگریس دور حکومت میں شروع کیا گیا۔ انہوں نے پرانے شہر میں میٹرو ٹرین کے آغاز اور فلک نما سے ایر پورٹ تک میٹرو کی توسیع کا مطالبہ کیا۔ انہوں نے کہا کہ ریاست کی 60 فیصد آمدنی حیدرآباد سے ہوتی ہے۔ انہوں نے کہا کہ پرانے شہر کی ترقی کے معاملہ میں کانگریس پارٹی مکمل تعاون کرے گی۔ سی ایل پی لیڈر بھٹی وکرامارکا نے اپنی شریک حیات کے ساتھ خصوصی پوجا میں حصہ لیا۔ سابق رکن پارلیمنٹ انجن کمار یادو، صدر خیریت آباد ضلع کانگریس کمیٹی ڈاکٹر روہن ریڈی، صدر سکندرآباد ضلع کانگریس کمیٹی انیل کمار یادو، نائب صدر پردیش کانگریس جی نرنجن اور دیگر قائدین نے ان کا استقبال کیا۔ اس موقع پر ایڈیشنل ڈائرکٹر جنرل پولیس سدھیر بابو جو بونال فیسٹول کے انتظامات کی نگرانی کررہے تھے بھٹی وکرامارکا سے خیرسگالی ملاقات کی۔ر
