کھلی دھوپ میں زیادہ دیرنہ رہنے اللہ کے مہمانوں سے اپیل
ریاض : ادارہ امورحرمین شریفین کی جانب سے زائرین مسجد الحرام کو دھوپ کی تپش سے بچانے کیلیے 20 ہزار چھتریاں تقسیم کی گئیں۔میڈیا کے مطابق مسجد الحرام میں سماجی امورکے معاون سیکرٹری جنادی علی مدخلی نے بتایا کہ ضیوف الرحمان (اللہ کے مہمان) کی سہولت کیلئے بہتر سے بہتر سہولتیں فراہم کرنا ہمارا مقصد ہے۔جذبہ خدمت کے تحت مختلف سماجی کام کیے جاتے ہیں تاکہ زائرین بیت اللہ کو ہرممکن آرام وسہولت مہیا کی جاسکے۔مدخلی نے مزید کہا کہ مسجد الحرام کے سماجی امورکے شعبے کی جانب سے زائرین حرم کو مختلف نوعیت کی خدمات فراہم کی جارہی ہیں جن میں انہیں دھوپ کی تمازت سے محفوظ رکھنے کیلئے چھتریوں کی تقسیم بھی شامل ہے۔علاوہ ازیں مختلف نوعیت کے تحائف بھی زائرین حرمین میں تقسیم کیے جاتے ہیں۔واضح رہے ان دنوں مملکت میں موسم کافی گرم ہے۔ دوپہر کے وقت دھوپ کی شدید تپش کے باعث پیدل چلنے والوں کو کافی دشواری کا سامنا کرنا پڑتا ہے۔اس حوالے سے محکمہ موسمیات کی جانب سے بھی زائرین کو ہدایت کی جاتی ہے کہ وہ کھلی دھوپ میں زیادہ دیرنہ رہیں۔ رہائش سے باہر جاتے وقت چھتری کا استعمال لازمی طورپرکیا جائے۔