ٹورنٹو۔25 ڈسمبر( سیاست ڈاٹ کام ) کینیڈین ٹینس اسٹار آندریسکو کا زخمی ہونے کے باعث نئے سال کا فاتحانہ آغاز کرنے کا خواب چکنا چور ہو گیا اوروہ نیوزی لینڈ میں سیزن کے پہلے ایونٹ سے باہر ہوگئیں۔ تفصیلات کے مطابق سال کے آخری گرانڈ سلام یو ایس اوپن کی چمپئن آندریسکو کو گھٹنے کی تکلیف نے کامیابیوں کا سفر تیز کرنے سے روک دیا۔ کینیڈین ٹینس اسٹار جنوری 2020ء کا نیوزی لینڈ میں مقرر اے ایس بی کلاسک ٹورنمنٹ نہیں کھیل سکیں گی، نئے سال کا فاتحانہ آغاز نہ کرنے پر کھلاڑی مایوسی کا شکار ہو گئی ہیں۔ انجری کا شکار کینیڈاکی آندریسکوٹینس ایونٹ 2020 سے آؤٹ ہونے پر سماجی رابطے کی ویب سائٹ ٹویٹر پر ایک ویڈیو پیغام جاری کیا جس میں وہ کہتی ہیں کہ نئے سال کا فاتحانہ آغاز نہ کرنے پر بہت زیادہ مایوس ہوں۔ انہوں نے مزید کہا کہ میں نے اپنی ٹیم سے بات کی ہے اور میں زخم سے بحالی کے لیے کوشاں ہوں، میری نیوزی لینڈ کے شہر آکلینڈ میں بہت ساری یادیں وابستہ ہیں، اب میری نظریں 2021ء میں ہونے والے ایونٹ پر ہے۔
