پاور پلانٹس کیلئے اراضیات کا تعین کیا جائے، آبپاشی عہدیداروں کے ساتھ جائزہ اجلاس
حیدرآباد۔ 12 اکتوبر (سیاست نیوز) وزیر آبپاشی اتم کماری ریڈی نے عہدیداروں کو ہدایت دی کہ پرانہیتا چیوڑلہ پراجکٹ کے لئے ترجیحی بنیادوں پر تفصیلی پراجکٹ رپورٹ تیار کریں۔ انہوں نے کالیشورم پراجکٹ کے تحت تمڑی ہڈی بیاریج کی تعمیر کے لئے بھی منصوبہ بندی کی ہدایت دی۔ اتم کمار ریڈی نے محکمہ آبپاشی کے عہدیداروں کے ساتھ اعلیٰ سطحی اجلاس منعقد کیا جس میں عہدیداروں کی جانب سے دو بیاریجس کے تعمیری کاموں کے سلسلہ میں پیش کردہ رپورٹ کا جائزہ لیا گیا۔ عہدیداروں نے بتایا کہ بیاریج کے حقیقی موقف کو برقرار رکھتے ہوئے بعض معمولی تبدیلیوں کے ذریعہ بحال کیا جاسکتا ہے۔ عہدیداروں نے کنال کی بحالی کے سلسلہ میں تکنیکی دشواریوں اور انجینئرس کے اقدامات سے واقف کرایا۔ ابتدائی منصوبہ کے مطابق پرانہیتا چیوڑلہ کے لئے تمڑی ہڈی سے چیوڑلہ تک پانی کی سربراہی کا منصوبہ تھا۔ عہدیداروں کے مطابق 45 کیلو میٹر تک کنال کی کھدائی کا کام مکمل ہوچکا ہے اور باقی کام جلد ہی مکمل ہوگا۔ اتم کمار ریڈی نے بیاریج کی تعمیر کو نقائص کے بغیر مکمل کرنے کی ہدایت دی۔ انہوں نے کہا کہ آئندہ ہفتہ پرنسپل سکریٹری راہول بوجا اور دیگر عہدیداروں کے ساتھ پراجکٹ کی پیشرفت پر جائزہ اجلاس منعقد ہوگا۔ انہوں نے جاریہ ماہ کے اختتام تک تفصیلی پراجکٹ رپورٹ تیار کرنے کی ہدایت دی۔ وزیر آبپاشی نے زرعی شعبہ کے لئے سولار انرجی کے استعمال کے امکانات کا جائزہ لینے کی ہدایت دی اور کہا کہ سولار پاور پلانٹس کے قیام کے لئے اراضیات کا تعین کیا جائے۔ انہوں نے ایس ایل بی سی ٹنل کے تعمیری کاموں کا بھی جائزہ لیا۔ اتم کمار ریڈی نے کہا کہ آبپاشی پراجکٹس کی مقررہ مدت میں تکمیل حکومت کی ترجیحات میں شامل ہے۔ 1
