صدر جمہوریہ رام ناتھ کووند کو یادداشت پیش ،مودی حکومت پر کانگریس قائد راہول گاندھی کی شدید تنقید
نئی دہلی :متنازعہ زرعی قوانین کے خلاف کسانوں کی تحریک 29ویں دن میں داخل ہو گئی ہے اور اس درمیان کانگریس کے سابق صدر را ہول گاندھی نے صدر جمہوریہ رام ناتھ کووند سے ملاقات کر کے ایک یادداشت پیش کی اور مطالبہ کیا کہ جلد از جلد ان قوانین کو واپس لینے کے لیے اقدام کیے جائیں، کیونکہ یہ کسانوں کے لیے انتہائی نقصان دہ ہیں۔ صدر جمہوریہ سے ملاقات کے بعد راہول گاندھی نے میڈیا سے بات چیت کرتے ہوئے کہا کہ ’’ہم نے صدر جمہوریہ کے سامنے اپنی بات رکھتے ہوئے بتایا کہ یہ جو قانون بنائے گئے ہیں، وہ کسان مخالف ہیں اور ان سے کسانوں و مزدوروں کو نقصان ہونے والا ہے۔‘‘کسانوں کی تحریک کو جائز ٹھہراتے ہوئے راہول گاندھی نے یہ بھی کہا کہ کسان پیچھے ہٹنے والے نہیں۔ پی ایم مودی کو یہ نہیں سوچنا چاہیے کہ بغیر قانون واپس لیے کسان مزدور گھر چلے جائیں گے۔‘حکومت کو چاہیے کہ پارلیمنٹ کا مشترکہ اجلاس طلب کر کے ان قوانین کو واپس لیا جائے۔ اپوزیشن پارٹیاں کسانوں اور مزدوروں کے ساتھ کھڑی ہیں ۔‘‘اس موقع پر راہول نے اپنی گزشتہ پیشین گوئیوں کا حوالہ دیتے ہوئے یہ بھی کہا کہ اگر زرعی قوانین واپس نہیں لیے جاتے تو مشکل وقت کا سامنا کرنا پڑ سکتا ہے۔ انھوں نے کہا کہ ’’میں ایڈوانس میں چیزیں بول دیتا ہوں۔ میں نے کورونا کے بارے میں بولا تھا کہ نقصان ہونے جا رہا ہے۔ اس وقت کسی نے بات نہیں سنی۔ آج پھر سے میں بول رہا ہوں، کسان مزدور کے سامنے کوئی بھی طاقت کھڑی نہیں ہو سکتی۔‘ انہوں نے کہا کہ ’’آج کسان تکلیف اور درد میں ہیں، کچھ کسانوں کی موت بھی ہوئی ہے۔ اگر آج یہ قانون واپس نہیں لیے گئے تو صرف کسی پارٹی نہیں بلکہ ملک کو نقصان ہونے والا ہے۔‘‘ انھوں نے مزید کہا کہ ’’ہندوستان میں اب جمہوریت باقی نہیں رہ گئی ہے۔ اگر آپ کو لگتا ہے کہ یہ ہے، تو یہ اب بس آپ کے تصورات میں رہ گیا ہے۔‘ راہول نے مزید کہا کہ ’’چین نے ہندوستان کی ہزاروں کلو میٹر زمین چھین لی ہے۔ وزیر اعظم ان کے بارے کیوں نہیں کہتے؟ ایک طرف آپ سسٹم کو توڑ رہے ہو، کسان و مزدور کو مار رہے ہو اور باہر سے طاقتیں دیکھ رہی ہیں، کہہ رہی ہیں کہ نریندر مودی ہندوستان کو کمزور کر ر ہے ہیں، ہمارے لیے اچھے مواقع بننے جا رہے ہیں۔‘‘ مودی حکومت کے مبینہ طور پر سرمایہ داروں کے حق میں کام کرنے اور اس کے خلاف آواز اٹھانے والوں کو ملک مخالف ٹھہرائے جانے کو تنقید کا نشانہ بناتے ہوئے راہول گاندھی نے کہا کہ ’’کرونی کیپٹلسٹ کیلئے پی ایم مودی پیسہ بنا رہے ہیں۔ جو بھی ان کے خلاف کھڑا ہونے کی کوشش کرے گا، وہ دہشت گرد کہلائے گا۔ وہ چاہے کسان ہو، مزدور ہو، یا موہن بھاگوت۔