کوالالمپور، 11 جولائی (یو این آئی) ملائیشیا کے سابق وزیر اعظم مآثر محمد نے تاریخی سنگ میل عبور کر لیا، وہ گزشتہ روز 100 برس کے ہو گئے ہیں۔مآثر محمد نے اپنی زندگی کا نصف سے زائد حصّہ سیاست اور عوامی خدمت میں گزارا ہے ۔ملائیشیا کی اس اہم سیاسی شخصیت نے اپنی انقلابی قیادت کی وجہ سے مقبولیت حاصل کی۔مآثر محمد پہلی بار 1981ء میں ملائیشیا کے وزیرِ اعظم منتخب ہوئے اور اُنہوں نے 2003ء تک ملک کے چوتھے وزیر اعظم کے طور پر خدمات انجام دیں پھر 2018ء کے الیکشن میں کامیابی حاصل کرکے دوسری بار وزیرِ اعظم منتخب ہوئے اور 2020ء تک ملک کے ساتویں وزیر اعظم کے طور پر اقتدار میں رہے۔ انہوں نے ملائیشیا پر سب سے طویل عرصہ حکومت کی اور ملک کے سب سے طویل عمر پانے والے وزیراعظم ہونے کا اعزاز بھی انہیں کے پاس ہے ۔مآثر محمد اپنی زندگی کی سنچری مکمل کرنے کے بعد بھی کافی متحرک نظر آتے ہیں۔یہاں تک کہ اپنی 100ویں سالگرہ کے موقع پر اپنے خاندان کے تمام افراد سے سالگرہ کی مبارکباد موصول کرنے کے بعد اپنا مشہور سفاری سوٹ پہن کر کام کرنے کیلئے اپنے دفتر گئے ۔اُنہوں نے اپنی سالگرہ کے موقع پر ایک خصوصی لائیو پوڈ کاسٹ میں کہا کہ میں ان تمام لوگوں کا شکریہ ادا کرنا چاہتا ہوں جو کیک، پھول، محبت بھرے خطوط لے کر مجھے 100 ویں سالگرہ کی مبارکباد دینے کیلئے آئے ۔مآثر محمد نے زندگی کی ایک سنچری مکمل ہونے پر کہا کہ 100 برس کا ہونا کافی خوفناک ہے ۔
