نیویارک، 5 نومبر (یو این آئی) سابق امریکی صدور بارک اوباما اور بل کلنٹن نے زہران ممدانی کو نیویارک کا میئر منتخب ہونے پر مبارکباد دی ہے ۔ بارک اوباما نے اپنے بیان میں کہا کہ “میں آج رات کامیاب ہونے والے تمام ڈیموکریٹک امیدواروں کو مبارکباد پیش کرتا ہوں۔ ہم ایسے رہنماؤں کے گرد متحد ہوئے ہیں جو عوام کے مسائل کی پرواہ کرتے ہیں۔ ابھی بہت کام باقی ہے لیکن مستقبل اب کچھ زیادہ روشن دکھائی دیتا ہے ۔سابق صدر بل کلنٹن نے بھی زہران ممدانی کو مبارکباد دیتے ہوئے کہا کہ میں آپ کی کامیابی کے لیے دعاگو ہوں۔خیال رہے امریکہ کے سب سے بڑے شہر نیویارک میں میئر کے امیدوار زہران ممدانی کامیاب ہوگئے اور نیویارک کے پہلے مسلم اور جنوبی ایشیائی نژاد میئر بن گئے ۔ مسلمان امیدوار زہران ممدانی اس مقابلے میں سابق گورنر اینڈریو کومو اور ری پبلکن امیدوار کرٹس سلوا کے ساتھ مقابلہ کررہے تھے ۔ خود کو سوشلسٹ ڈیموکریٹ قرار دینے والے 34 سالہ زہران ممدانی کی جیت کو ریپبلکن صدر ڈونلڈ ٹرمپ کے لیے ایک دھچکا قرار دیا جا رہا ہے جن کی دوسری مدت صدارت کے آغاز سے اب تک یہ سب سے اہم انتخابات ہیں۔
زہران ممدانی کی جیت پر ٹرمپ کی انوکھی وضاحت
نیو یارک،5 نومبر (یو این آئی) امریکی صدر ڈونلڈ ٹرمپ نے نیو یارک مئیر کے انتخابات میں ریپبلکن امیدوار کی شکست کی وجہ بتادی۔ امریکی صدر ٹرمپ نے سوشل میڈیا پوسٹ میں لکھا بیلٹ پیپر پر میرا نام نہیں تھا اور شٹ ڈاون کی وجہ سے ریپبلکنز جیت نہیں سکے ۔ انہوں نے ایک اور پوسٹ میں ریپبلکنز کو واپس کام پر آنے کی ہدایت کی ہے ، ٹرمپ نے پوسٹ میں لکھا کہ ووٹر ریفارمز کئے جائیں، ووٹر آئی ڈی لازمی قرار دی جائے ، ڈاک کے ذریعے ووٹنگ ختم کی جائے اور کانگریس میں بل روکنے کے خلاف قانون کو ختم کیا جائے ۔ نیویارک کے میئر کے لیے ہونے والے الیکشن میں ٹرمپ اور ریپبلکن امیدوار کو جھٹکا لگا ہے اور ٹرمپ کی بھرپور مخالفت کے باجود ڈیموکریٹ کے مسلم امیدوار زہران ممدانی نیویارک سٹی کے میئر منتخب ہوگئے ۔