تحصیلداروں کے ساتھ ضلع ایڈیشنل کلکٹر کی ویڈیو کانفرنس
پداپلی۔ضلع میں موجود زیرالتواء اراضی مسائل کو جلد سے جلد حل کرنے کے لئے موثر اقدامات کرنے کی پداپلی ضلع ایڈیشنل کلکٹر لکشمی نارائنا نے متعلقہ عہدیداروں کو ہدایت دی۔ اراضی مسائل اور پرجاوانی درخواستوں سے متعلقہ امور پر بروز جمعہ ضلع ایڈیشنل کلکٹر نے ضلع کے تمام تحصیلداروں کے ہمراہ سمعی و بصری کانفرنس کا انعقاد عمل میں لایا۔ اس کانفرنس سے خطاب کرتے ہوئے انھوں نے کہا کہ اراضی مسائل کے حل کے تحت حکومت خصوصی اقدامات کررہی ہے۔ ڈیجیٹل دستخط کا عمل زیرالتواء ہونے کے وجوہات ایڈیشنل کلکٹر نے دریافت کیں اور اراضی مسائل پر عہدیداروں کو خصوصی توجہ مرکوز کرتے ہوئے جلد از جلد حل کرنے کی ہدایت دی۔ضلع بھر میں می سیوا کے تحت جملہ زیرالتواء میوٹیشن ‘ سکسیشن درخواستوں کی حکومت کے رہنمایانہ خطوط پر عمل کرتے ہوئے بنیادی سطح سے جانچ منعقد کر حل کرنے کی ہدایت دی۔می سیوا سے موصول شدہ درخواستوں کو وقت مقررہ پر حل کرنے کے تحت اقدامات کرنے کی ہدایت دی۔ پرجاوانی پروگرام کے تحت منڈل کی سطح پر موصول شدہ درخواستوں اور ان کے حل کے تحت کئے گئے اقدامات سے متعلق ایڈیشنل کلکٹر نے تفصیلات دریافت کیں۔ عوام کے مسائل پر رد عمل ظاہر کرتے ہوئے فوری اقدامات کرنے کی انھوں نے عہدیداروں کو ہدایت دی۔ ضلع انچارج ڈی آر او کے۔ نرسمہا مورتی ‘ پداپلی ریوینو ڈویڑن آفیسر شنکر کمار’ ضلع کے تمام تحصیلداران’ متعلقہ عہدیداران وغیرہ نے اس کانفرنس میں شرکت کی۔
