نظام آباد۔ 24 اکتوبر (سیاست ڈسٹرکٹ نیوز) ضلع کلکٹر نظام آباد ٹی ونئے کرشنا ریڈی نے آج ورنی منڈل کے سدھا پور گاؤں میں زیرِ تعمیر ریزروائر کے تعمیری کاموں کا معائنہ کیا۔ یہ ریزروںائر نظام ساگر کے نان کمانڈ ایریا کے اُن علاقوں کے لیے تعمیر کیا جارہا ہے جہاں اب تک آبپاشی کی کوئی سہولت دستیاب نہیں تھی۔ ضلع کلکٹر مسٹر ونئے کرشنا ریڈی نے بتایا کہ اس پراجیکٹ کا مقصد کسانوں کو آبپاشی کے بہتر ذرائع فراہم کرنا ہے۔کلکٹر ٹی ونئے کرشنا ریڈی نے تقریباً پندرہ دن قبل بھی ریزروائر کے کاموں کا جائزہ لیا تھا اور اس بار انہوں نے دوبارہ میدانی سطح پر تفصیلی معائنہ کیا۔ انہوں نے ریونیو، فاریسٹ، اریگیشن اور سروے اینڈ لینڈ ریکارڈز کے عہدیداروں کے ساتھ باندھ کی تعمیر کے لیے سرحدی حدود کا تعین کیا۔ دشوار گزار راستوں اور پہاڑی علاقوں سے پیدل چل کر کلکٹر موقع پر پہنچے اور وہاں سے فاریسٹ گزٹ نوٹیفکیشن میں درج ضلع جنگلاتی حدود کا بھی معائنہ کیا۔انہوں نے متعلقہ عہدیداروں سے زمین کی حد بندی، تنازعات اور تکنیکی مسائل کے بارے میں تفصیلات حاصل کیں اور اس موقع پر ان کے ہمراہ بودھن سب کلکٹر وکاس مہتو، سروے اینڈ لینڈ ریکارڈز اے۔ڈی۔ اشوک اور دیگر عہدیدار موجود تھے۔ کلکٹر نے ہدایت دی کہ مختلف محکموں کے درمیان بہتر ربط و تعاون کے ذریعہ حدود کی نشاندہی جلد مکمل کی جائے تاکہ تعمیری کاموں میں کوئی رکاوٹ نہ آئے۔انہوں نے کہا کہ اگر ضرورت پیش آئی تو فاریسٹ لینڈ کی حصولیابی اور سرکاری منظوری کے لیے حکومت کو سفارشات روانہ کی جائیں گی۔ کلکٹر کے ہمراہ تحصیلدار سائلُو اور دیگر مقامی عہدیدار بھی موجود تھے۔
