بنگلورو :ساؤتھ زون نے ویسٹ زون کو کھیل کے ہر شعبے میں پیچھے چھوڑتے ہوئے اتوار کو دلیپ ٹرافی چیمپئن شپ کا ٹائٹل اپنے نام کیا۔ویسٹ زون کی کپتان پرینکا پنچال (95) نے شکست سے بچنے کی بھرپور کوشش کی لیکن ان کی ٹیم واسوکی کوشک (4/36) اور سائی کشور (4/57) کی خطرناک بولنگ کے سامنے ڈھیرہوگئی۔ ساؤتھ زون نے 14ویں بار دلیپ ٹرافی کا ٹائٹل جیتا ہے ۔ اس فتح کے ساتھ انہوں نے گزشتہ سال ویسٹ زون سے شکست کا بدلہ بھی لے لیا۔ گزشتہ سال ویسٹ زون نے فائنل میں ساؤتھ زون کو 294 رنز سے شکست دی تھی۔ اتوار کو جنوبی زون کو جیت کے لیے پانچ وکٹوں کی ضرورت تھی، جس میں سب سے بڑی رکاوٹ انگد نما پنچال کریز پر تھے ۔
تاہم، کاورپا نے اس رکاوٹ کو جلدی سے ہٹا دیا جب پنچال ان کی گیند پر وکٹ کے پیچھے کیچ ہو گئے ۔ سائی کشور نے ایک کے بعد ایک وکٹ لے کر باقی کام مکمل کیا۔ اتیت سیٹھ (9) اور دھرمیندر سنگھ جڈیجہ (15) نے آٹھویں وکٹ کے لیے 23 رنز جوڑے لیکن شکست سے بچنے میں ناکام رہے ۔ ساؤتھ زون نے پہلے بیٹنگ کرتے ہوئے پہلی اننگز میں 213 رنز بنائے جس کے جواب میں ویسٹ زون پہلی اننگز میں 146 رنز پر ڈھیر ہوگئی۔ ساؤتھ کے بلے بازوں نے 67 رنز کی برتری کے ساتھ دوسری اننگز کا آغاز کیا اور 230 رنز بنا کر ویسٹ کو جیت کے لیے 298 رنز کا ہدف دیا تھا۔
