پٹنہ : بہار کے وزیر اعلی اور جنتا دل یونائیٹڈ (جے ڈی یو) کے قومی صدر نتیش کمار نے ریاست کی سابقہ حکومتوں کانگریس اور راشٹریہ جنتا دل (آر جے ڈی) کا نام لیے بغیر ان پر نشانہ لگاتے ہوئے کہا کہ جن لوگوں کو پہلے موقع ملا انہوں نے خواتین کی ترقی کے لیے کوئی کام نہیں کیا۔ ہفتہ کو خواتین کے عالمی دن کے موقع پر یہاں پارٹی دفتر میں بہار پردیش مہیلا جے ڈی یو کے زیراہتمام ناری شکتی کانفرنس کا افتتاح کرنے کے بعد اپنے خطاب میں مسٹر کمار نے کہا کہ آج خواتین کے عالمی دن کے موقع پر میں آپ تمام خواتین کو مبارکباد اور نیک خواہشات پیش کرتا ہوں۔ انہوں نے کہا کہ میں اس پروگرام کا حصہ بن کر بہت خوش ہوں۔ ابتدا ہی سے وہ خواتین کی ترقی اور بااختیار بنانے کے لیے مسلسل کام کر رہے ہیں تاکہ وہ خود انحصار بن سکیں۔ وزیراعلیٰ نے کہا کہ جن لوگوں کو پہلے موقع ملا انہوں نے خواتین کو آگے بڑھانے کے لیے کچھ نہیں کیا۔ انہوں نے کہا کہ خواتین کی بڑی تعداد ہر شعبے میں ترقی کر رہی ہے ۔ یہ دیکھ کر وہ بہت خوش ہوتے ہیں۔ جے ڈی یو کی بہار ریاستی خواتین سیل کی صدر ڈاکٹر بھارتی مہتا نے وزیر اعلیٰ کو گلدستہ، شال اور نشان پیش کر کے مبارکباد پیش کی۔
کانفرنس میں موجود تمام خواتین نے تالیاں بجا کر وزیر اعلیٰ کا استقبال کیا۔ اس موقع پر آبی وسائل اور پارلیمانی امور کے وزیر وجے کمار چودھری، وزیر ٹرانسپورٹ شیلا منڈل، جے ڈی یو کے کارگزار قومی صدر اور رکن پارلیمنٹ سنجے کمار جھا، جے ڈی یو کے ریاستی صدر امیش سنگھ کشواہا، قانون ساز کونسلر سنجے کمار سنگھ عرف گاندھی جی، سابق وزیر رنجو گیتا کے علاوہ بڑی تعداد میں دیگر معززین اور خواتین موجود تھیں۔
