کوالالمپور ۔ 29 مئی (سیاست ڈاٹ کام) ملائیشیا کے سابق وزیر اعظم مہاتر محمد کو ان کی سیاسی جماعت سے بے دخل کردیا گیا۔سیاسی جماعت بیراستو کی جانب سے جاری بیان میں کہا گیا کہ ’مہاتر محمد کی رکنیت فوری طور پر منسوخ کی جاتی ہے‘۔واضح رہے کہ مہاتر محمد بیراستوپارٹی کے شریک بانیوں میں سے ہیں۔الجزیرہ کی رپورٹ کے مطابق پارٹی کے چیرمین مہاتر محمد کو ملائیشیا کی حکومت کی حمایت نہ کرنے پر برطرف کیا گیا جس کی سربراہی وزیراعظم محی الدین یٰسین کررہے ہیں۔خیال رہے کہ محی الدین یاسین پارٹی کے صدر ہیں۔سوشل میڈیا پر وائرل مراسلے میں پارٹی نے واضح کیا کہ جب گزشتہ ہفتے پارلیمنٹ کا اجلاس ہوا تھا تو مہاتر محمد اپوزیشن کے ساتھ بیٹھ گئے، انہوں نے ظاہر کردیا کہ وہ پارٹی کے صدر اور وزیراعظم محی الدین کی قیادت کو تسلیم نہیں کرتے، اس طرح وہ خود ہی رکنیت کے دائرے سے باہر ہوگئے۔
