کولکاتا: سابق کرکٹ کیپٹن سورو گنگولی کی بیٹی کی گاڑی کو حادثہ پیش آیا ہے۔ جمعہ کو گنگولی کی بیٹی ثنا اپنی گاڑی میں کولکاتا کے ڈائمنڈ ہاربر روڈ پر جارہی تھی کہ پیچھے سے ایک بس نے ان کی گاڑی کو زور دار ٹکر ماری۔ثنا اس وقت کار کے اندر موجود تھی اور ان کی گاڑی ڈرائیور چلا رہا تھا۔ خوش قسمتی سے گنگولی کی بیٹی اور ڈرائیور حادثے میں محفوظ ہیں۔ میڈیا رپورٹ کے مطابق حادثے کے بعد بس فرار ہوگئی، جس پر ثنا کی گاڑی کے ڈرائیور نے بس کا پیچھا کیا اور کچھ فاصلے کے بعد اسے روکا گیا۔ اس دوران پولیس کو بھی اطلاع دی گئی۔ پولیس فوری طور پر موقع پر پہنچی اور بس کے ڈرائیور کو حراست میں لیا۔ذرائع کا کہنا ہے کہ ثنا کی کار کو بس کی ٹکر سے کچھ نقصان پہنچا۔ پولیس کے مطابق اب تک کسی کی بھی جانب سے حادثے سے متعلق باضابطہ شکایت درج نہیں کرائی گئی۔
