نئی دہلی: لیفٹیننٹ جنرل سادھنا سکسینہ نائر نے جمعرات کو آرمی میڈیکل سروسز کے ڈائریکٹر جنرل کا چارج سنبھال لیا اور وہ اس باوقار عہدے پر تعینات ہونے والی پہلی خاتون ہیں۔ اس سے قبل وہ ایئر مارشل کے عہدے پر ترقی پانے والی پہلی خاتون تھیں اور ڈائریکٹر جنرل، ہسپتال سرویسز کے عہدے پر فائز تھیں۔ لیفٹیننٹ جنرل نائر نے پونے کے آرمڈ فورسز میڈیکل کالج سے ایک ممتاز تعلیمی ریکارڈ کے ساتھ گریجویشن کیا اور دسمبر 1985 میں آرمی میڈیکل کور میں کمیشن حاصل کیا۔ انہوں نے فیملی میڈیسن میں ماسٹر کی ڈگری حاصل کی ہے اور ماں اور بچے کی صحت اور صحت کی دیکھ بھال کے انتظام میں ڈپلومہ کیا ہے اور ایمس، نئی دہلی میں میڈیکل انفارمیٹکس میں دو سالہ تربیتی پروگرام مکمل کیا ہے۔
