ممبئی۔ بالی ووڈ اداکارہ سارا علی خان سوپرہٹ فلم ’’کچھ کچھ ہوتا ہے‘‘ کے ری میک میں کام کرنے کی خواہش مند ہیں، انہوں نے کہا کہ وہ منفرد اور جداگانہ انداز میں اپنا کردار ادا کرنا چاہتی ہیں۔ انہوں نے مزید کہا کہ میں سوپرہٹ فلم ’’کچھ کچھ ہوتا ہے‘‘ کے ری میک میں کام کرنے کی خواہاں ہوں۔ سارا نے اس ری میک کے لیے کچھ ستاروں کے نام بھی بتائے ہیں۔سارا علی خان نے کہا کہ مجھے فلم ’’کچھ کچھ ہوتا ہے‘‘ بے انتہا پسند آئی تھی۔ اگر کرن جوہر فلم ’’کچھ کچھ ہوتا ہے‘‘ کا ری میک بناتے ہیں تو اس میں بطور ستارہ میں، جانہوی اور وجے دیورکونڈا ہوں تو شاندار ہوگا۔ انہیں ابھی فون کرکے اس سے متعلق آگاہ کردینا چاہئے۔ مجھے یقین کامل ہے کہ وہ اس بات پر لازماً غورکریں گے۔ مجھے لگتا ہے کہ ہمیں ایسا کرنا چاہئے۔غور طلب ہے کہ 1998 میں کرن جوہر کی ہدایت کاری میں بننے والی فلم ’’کچھ کچھ ہوتا ہے‘‘ کے ستاروں میں شاہ رخ خان، کاجول اور رانی مکھرجی شامل تھے، جنھوں اپنی اداکاری سے لوگوں کے دلوں میں خاص جگہ بنائی اور فلم نے بے پناہ مقبولیت حاصل کی تھی اور یہ اپنے دور کی چند شاندار فلموں میں سے ایک ہے۔اس فلم نے جہاں شاہ رخ کاجول جوڑی کی کامیابی میں ایک فلم کا اضافہ کیا تو دوسری جانب اس نے کئی ایوارڈ جیتے ہیں۔
