دکاندار کی توجہ ہٹا کر رقم لوٹنے کے خلاف کارروائی
حیدرآباد : دوکانداروں کو امریکی ڈالر دکھا کر انہیں بدلنے کی درخواست کرتے ہوئے رقم لوٹنے والی ایک تین رکنی بین الاقوامی سارقوں کی ایرانی ٹولی کو پولیس نے بے نقاب کردیا اور ان کے قبضہ سے 811 امریکی ڈالر 35 ہزار روپئے انڈین کرنسی کو ضبط کرلیا۔ کمشنر پولیس مہیش بھگوت نے بتایا کہ ایران سے تعلق رکھنے والے توجہ ہٹا کر سرقہ کرنے والے تین سارقین 45 سالہ محمد حسین، 39سالہ وحید رجب اور 40 سالہ ناصر عابدی ساکنان پیرامونٹ کالونی ٹولی چوکی متوطن تہران ایران کو گرفتار کرلیا۔ گذشتہ 2 ماہ کے عرصہ میں ان تینوں نے 5 وارداتیں انجام دیں۔ ایل بی نگر میں 2، نارسنگی، راجندر نگر اور کارخانہ حدود میں ایک ایک واردات انجام دی۔ ایل بی نگر حدود میں دو شکایتوں کے بعد پولیس ایل بی نگر اور سی سی ایس ایل بی نگر نے تحقیقات کرتے ہوئے انہیں گرفتار کرلیا۔ منصورآباد میں چاول کی دوکان پہنچ کر انہوں نے انگریزی میں بات کی اور اس دکاندار سے ڈالر کو بدلنے کی خواہش کی جس کے بعد اپنی باتوں میں اسے پھانس کر غلہ سے 35 ہزار کا سرقہ کرلیا جبکہ ساگر روڈ پر ایک آئیل کی دکان کے مالک سے 22 ہزار روپئے لوٹ لئے۔ نوٹوں کے بنڈل سے نوٹ گنتے وقت بڑی چالاکی سے یہ لوگ نوٹ غائب کرنے کا ہنر رکھتے ہیں۔ کمشنر پولیس نے بتایا کہ محمد حسین 6 ماہ قبل رجب 7 ماہ قبل اور عابدی 18 ماہ قبل ہندوستان آئے تھے جو دہلی میں مقیم تھے۔ پیشہ سے یہ لوگ کپڑوں کا کاروبار کرتے تھے۔ ملک بھر میں لاک ڈاؤن عائد تھا اور حیدرآباد میں اپریل کے مہینے میں لاک ڈاؤن نہیں تھا جس کے سبب انہوں نے حیدرآباد کا رخ کیا اور ٹولی چوکی علاقہ میں رہنے لگے۔ پولیس کمشنر نے بتایا کہ ان کے خلاف پی ڈی ایکٹ نافذ کیا جائے اور فاسٹ ٹریک کورٹ میں مقدمہ چلایا جائے گا۔
