نئی دہلی: عام آدمی پارٹی کے رکن پارلیمنٹ سنجے سنگھ نے راجیہ سبھا میں اتراکھنڈ میں پیش آنے والے سانحہ چمولی میں ہلاک ہونے والوں کے لواحقین کو 25 لاکھ روپے معاوضہ دینے کا مطالبہ کیا۔مسٹر سنجے سنگھ نے جمعرات کے روز وقفہ صفر کے دوران کہا کہ مرکزی اور ریاستی حکومت نے اس سانحہ میں ہلاک ہونے والوں کے لواحقین کو 2 لاکھ روپے کی امداد کا اعلان کیا ہے ، جو ناکافی ہے ۔ انہوں نے بتایا کہ چمولی میں رونما ہونے والی قدرتی آفت میں جاں بحق 34 افراد کی نعشیں نکال لی گئیں ہیں جبکہ 173 افراد تاحال لاپتہ ہیں۔ سکیورٹی اہلکار پن بجلی پروجیکٹ کی سرنگ میں پھنسے ہوئے لوگوں کو بچانے کی امدادی کارروائیوں میں مصروف ہیں۔تازہ اطلاعات کے مطابق سرنگ میں پانی بھرجانے کی وجہ سے آج امدادی کاموں کو روک دیا گیا اور راحت کاری کام انجام دینے والے کارکنوں کو باہر نکال لیا گیا ہے۔ اس واقعہ میں جانی نقصان کی حتمی تعداد بتانا مشکل ہے کیونکہ کئی مزدور ابھی پھنسے ہوئے ہیں۔
