بنڈلہ گوڑہ پولیس اسٹیشن میں اینٹی کرپشن بیورو کی کارروائی
حیدرآباد /22 نومبر ( سیاست نیوز ) انسداد رشوت ستانی بیورو نے پرانے شہر میں اہم کارروائی کرتے ہوئے رشوت خور پولیس ملازمین کو گرفتار کرلیا۔ اے سی بی نے بنڈلہ گوڑہ پولیس اسٹیشن میں کارروائی کرتے ہوئے ایک سب انسپکٹر پولیس اور دو کانسٹیبلس کو رنگے ہاتھوں گرفتار کرلیا ۔ اینٹی کرپشن بیورو نے آر پون سب انسپکٹر پولیس سی ایچ راما کرشنا اور بی سنتوش پولیس کانسٹیبلز کو رشوت لیتے ہوئے رنگے ہاتھوں گرفتار کرلیا ۔ سب انسپکٹر پون نے بنڈلہ گوڑہ پولیس اسٹیشن میں درج مقدمہ کو بند کرنے کیلئے شکایت گذار سے 30 ہزار روپئے کا مطالبہ کیا تھا اور 15 ہزار روپئے رشوت کی رقم کانسٹیبل راج کرشنا کے ذریعہ حاصل کی تھی ۔ جبکہ بی سنتوش کانسٹیبل نے شکایت گذار سے 2 ہزار روپئے کا مطالبہ کرتے ہوئے مقدمہ کو بند کرنے کا وعدہ کیا ۔ اس دوران اینٹی کرپشن بیورو حیدرآباد سٹی رینج 2 یونٹ نے کارروائی کرتے ہوئے سب انسپکٹر اور کانسٹیبلس کو رنگے ہاتھوں گرفتار کرلیا اور نامپلی کی خصوصی اے سی بی عدالت میں پیش کردیا ۔ ع
