1984 سکھ مخالف فسادات …
نئی دہلی،4مارچ( سیاست ڈاٹ کام)سپریم کورٹ نے 1984کے سکھ مخالف فسادات سے متعلق معاملوں میں عمرقید کی سزا کاٹ رہے سابق کانگریسی رکن سجن کمار کو صحت کی جانچ کے لئے جمعرات کو ایمس کے میڈیکل بورڈ کے سامنے 10:30 بجے لے جانے کی آج ہدایت دی۔چیف جسٹس شرد اروند بوبڈے ،جسٹس بی آر گوگوئی، آر جسٹس سوریہ کانت کی بنچ نے کہا کہ میڈیکل بورڈطے کرے گا کہ سجن کمار کو ایمس میں داخل کرنے کی ضرورت ہے یا نہیں۔عدالت نے کہا کہ میڈیکل بورڈ ایک ہفتے کے اندر اپنی رپورٹ بنچ کو سونپے گا۔سماعت کے دوران سجن کمار کے وکیل وکاس سنگھ نے کہا کہ ان کے موکل کا وزن 67کلوگرام سے گھٹ کر 53کلوگرام ہوگیاہے ۔سالیسیٹرجنرل تشار مہتا نے ایمس کی رپورٹ کے حوالے سے کہا کہ گزشتہ 10دسمبر کو آٹھ ڈاکٹروں کی ٹیم نے جانچ کی تھی۔ان کے سبھی اعضا صحیح کام کررہے ہیں۔ان کا صرف بلڈ پریشر بڑھا ہواہے ۔کوئی غیر معمولی پریشانی نہیں ہے ۔مسٹر مہتا نے کہاکہ ایمس کے ہی ماہرین نے رپورٹ درج کی ہے اور تین مہینے کے فرق پر جانچ کی سفارش بھی کی تھی۔چیف جسٹس نے سجن کمار کی عمر پوچھی،اس پر ان کے وکیل نے کہا کہ ان کے موکل کی عمر 75سال ہے ۔اس معاملے کے ایک فریق کے وکیل دشینت دوے نے کہا آج بھلے ہی سجن کمار کی عمر زیادہ ہے۔واضح رہے کہ سجن کمار نے عدالت سے اپنی بگڑتی صحت کے پیش نظر ضمانت پر رہا کرنے کی اپیل کی ہے ۔
